ق ر مەملەكەتتىك باس سانيتارلىق دارىگەرى ايجان ەسماعامبەتوۆا اتىراۋ وبلىسىنداعى تەڭىز كەنىشىندە 935 ادامنىڭ كوروناۆيرۋس جۇقتىرعانىن ايتتى. بۇل تۋرالى Qamshy.kz اقپارات اگەنتتىگى قازاقپارات دەرەگىن نەگىزگە الىپ حابارلايدى.

– ىندەتكە شالدىعۋ كورسەتكىشىنىڭ وسىمىنە جابىق ۇجىمدارداعى ناۋقاستار سانىنىڭ ارتۋى سەبەپ بولىپ وتىر. بۇگىنگى كۇنى 935 جاعداي تىركەلگەن تەڭىز كەنىشىندە سىرقاتتانۋشىلاردىڭ ارتۋى بايقالادى. شىمكەنتتە دە «PetroKazakhstan Oil Production» ج ش س قىزمەتكەرلەرى اراسىندا جاپپاي سىرقاتتانۋ تىركەلدى. كومپانيا قىزمەتكەرلەرى اراسىندا 101 جاعداي، مەردىگەر ۇيىمداردا – 23 جانە ءۇي وشاقتارىندا بايلانىستا بولعاندار اراسىندا 69 جاعداي تىركەلىپ وتىر. قاراعاندى وبلىسىندا «قازاقمىس» كوروپوراسياسى كەنىشتەرىنىڭ بىرىندە 34 جاعداي تىركەلدى، – دەدى ا. ەسماعامبەتوۆا.

ونىڭ ايتۋىنشا، تەڭىز كەنىشىندە سىرقاتتانۋدىڭ ارتۋىنا بايلانىستى اتىراۋ وبلىسىنا ۇكىمەتتىك كوميسسيا جىبەرىلگەن. كوميسسيا شەشىمىمەن اتالعان كەنىشتە كوروناۆيرۋستىڭ الدىن الۋعا باعىتتالعان جۇمىستاردىڭ جوسپارى، كەستەسى قابىلداندى.

– قازىرگى ۋاقىتتا اتالعان جوسپاردىڭ، كەستەنىڭ ورىندالۋىنا باقىلاۋ جۇرگىزۋ قاجەت. ولاي بولماعان جاعدايدا، ناۋقاستار سانىنىڭ ارتۋىنا بايلانىستى وقشاۋلانۋعا جانە كاسىپورىننىڭ وزدىگىنەن نە ءماجبۇرلى تۇردە جابىلۋىنا الىپ كەلەدى، – دەپ اتاپ ايتتى.