Pakistan International Airlines ۇشاعى لاحور قالاسىنان كاراچي قالاسىنا ۇشىپ بارا جاتىپ، اپاتقا ۇشىرادى، دەپ مالىمدەدى پاكىستان اۆياسيا وكىلدەرى. بۇل تۋرالى قامشى ءتىلشىسى BBC-گە سىلتەمە جاساپ حابارلايدى. 

اقپاراتتىق حابارلاماعا ساي، شامامەن 99 جولاۋشى، ەكيپاجدىڭ سەگىز مۇشەسى بولعان ۇشاق لاحور قالاسىنان پاكىستاننىڭ ەڭ ءىرى اۋەجايلارىنىڭ ءبىرى – دجيننا حالىقارالىق اۋەجايىنا ۇشىپ بارا جاتقان. 

الەۋمەتتىك جەلىلەردە بولىسىلگەن سۋرەتتەردە اپات بولعان جەردەن ءورت شىعىپ جاتقانىن كورۋگە بولادى.

وقيعا ورنىنا جەدەل قىزمەتتەر كەلگەن.

– ۇشاق كاراچيدە اپاتقا ۇشىرادى. ءبىز جولاۋشىلاردىڭ سانىن راستاۋعا تىرىسىپ جاتىرمىز، ءبىراق باستاپقى مالىمەت بويىنشا 99 جولاۋشى مەن ەكيپاجدىڭ سەگىز مۇشەسى بار، – دەدى پاكىستاننىڭ اۆياسيالىق وكىلدىگىنىڭ قىزمەتكەرى ابدۋل ساتتار حوحار.

اپات ەلدىڭ كوممەرسيالىق رەيستەرىن قايتا باستاۋعا بىرنەشە كۇن قالعاندا بولعان.