بالاباقشالاردا كەزەكشى توپتار جۇمىسىن باستادى. بۇل تۋرالى قوعامدىق كوممۋنيكاسيا ورتالىعىندا وتكەن بريفينگتە مو ءبىلىم باسقارماسىنىڭ باسشىسى اسقار سەيدالييەۆ مالىمدەدى.

ماڭعىستاۋ وبلىسىنىڭ باس مەملەكەتتىك سانيتارلىق دارىگەرىنىڭ 07.05.2020 جىلعى قاۋلىسى نەگىزىندە، ءبىلىم باسقارماسى مەكتەپكە دەيىنگى ۇيىمداردا كەزەكشى توپتار اشۋ تۋرالى بۇيرىعىن شىعاردى.

وسىعان بايلانىستى 13 مامىردان باستاپ اقتاۋ، جاڭاوزەن قالالارى مەن  قاراقيا اۋدانىنىڭ قۇرىق جانە جەتىباي اۋىلدارىنان بارلىعى 58 مەكتەپكە دەيىنگى ۇيىمداردا 87 كەزەكشى  توپ اشىلدى.

بۇگىنگى تاڭدا اتالعان توپتاردا 865 بالا (اقتاۋ- 498، جاڭاوزەن-281، قاراقيا اۋدانى– 86)، ياعني بارلىق بالاباقشا كونتينگەنتىنىڭ 2،3 % (مەملەكەتتىك-423، 1،6%، جەكەمەنشىك-442، 3،6 %)بار.

بارلىعى 364 پەداگوگ پەن 685 تەحنيكالىق قىزمەتكەرلەر شتاتتىق رەجيمدە (مەدبيكە، اسپاز، كىر جۋۋىشى جانە ت.ب) جۇمىسقا شىقتى.

بالاباقشالاردا كۇندەلىكتى بالالاردى قابىلداۋ دەنە قىزۋلارىن ولشەۋ ارقىلى تازا اۋدا، ياعني بالاباقشا اۋلاسىندا جۇرگىزىلەدى جانە توپتاعى بالالار سانى 10-نان اسپايدى.

 سونداي-اق، كۇندەلىكتى ىلعالدى تازالىق جۇمىستارى، زالالسىزداندىرۋ، جەلدەتۋ، دەزينفەكسيالىق جۇمىستار تالاپقا ساي جۇرگىزىلەدى.