وقۋلىقتاردى تاپسىرۋ جۇمىسى كەستە بويىنشا جۇرگىزىلۋى قاجەت. بۇل تۋرالى مو قوعامدىق كوممۋنيكاسيا ورتالىعىندا وتكەن بريفينگتە ماڭعىستاۋ وبلىسىنىڭ ءبىلىم ساپاسىن باقىلاۋ دەپارتامەنتىنىڭ باسشىسى ەسبولات ءومىرزاق حابارلادى.

ءبىلىم بەرۋ ۇيىمدارى مەن مۇعالىمدەردەن سۇرالاتىن ەسەپتىلىكتەردىڭ سانىن شەكتەۋ تۋرالى 6-ساۋىردە 130-بۇيرىق قابىلداندى. 25-مامىر كۇنى وتەتىن سوڭعى قوڭىراۋدى ءاربىر سىنىپ جەتەكشىسى ءوز وقۋشىلارىمەن وتكىزەتىن بولادى. وقۋ جىلىنىڭ اياقتالۋىنا بايلانىستى وقۋلىقتاردى مەكتەپ كىتاپحاناسىنا تاپسىرۋ جۇمىسى دا بەكىتىلگەن كەستە بويىنشا رەت-رەتىمەن جۇرگىزىلەدى. تاعى ايتا كەتەتىن ءجايت، ءمۇعالىم ەڭبەك دەمالىسىنا شىعۋىنا بايلانىستى مەكتەپ وقۋشىلارىنا وقۋلىقتارىڭىزدى تەز ارادا تاپسىرىڭىز دەپ، مەكتەپكە توپتاپ شاقىرۋعا بولمايدى. ال جوسپار بويىنشا ۇلتتىق ءبىرىڭعاي تەستىلەۋ بەلگىلەنگەن ۋاقىت بويىنشا وتپەك. 

«ونلاين سوڭعى قوڭىراۋ» شاراسى بەلگىلى ءبىر مەرزىمدە وتكىزىلمەيدى. يكەمدى كەستە بويىنشا وتەدى. 3-4 ماۋسىمدا وتەتىن اتەستات بەرۋ كەزىندە ساقتىق شارالارى قاتاڭ ساقتالۋى قاجەت. ەگەر ساقتىق شارالارى ساقتالماي، ايتىلعان ۇسىنىستار ەسكەرىلمەيتىن بولسا، ءبىزدىڭ تاراپىمىزدان ءتيىستى اكىمشىلىك شارا الىنۋى مۇمكىن»،- دەدى ماڭعىستاۋ وبلىسىنىڭ ءبىلىمسالاسىنداعى باقىلاۋ دەپارتامەنتىنىڭ باسشىسى ەسبولات ءومىرزاق .