الماتى قالاسىنىڭ اكىمى باقىتجان ساعىنتايەۆ تۇلەكتەردى سوڭعى قوڭىراۋمەن قۇتتىقتادى. بۇل تۋرالى Facebook پاراقشاسىندا جازدى.

– بۇگىن مەكتەپ تۇلەكتەرى ءۇشىن ەڭ ماڭىزدى كۇن. الماتىدا 9299 مەكتەپ تۇلەگى ۇلكەن ومىرگە قانات قاقتى. سونىڭ ىشىندە 545 تۇلەك – «التىن بەلگى» يەگەرى، 714 وقۋشى وقۋ وزاتى اتاندى. بيىل مەكتەپتەردە سوڭعى قوڭىراۋ العاش رەت ونلاين تۇردە سوعىلدى. مەكتەپ ديرەكتورلارى مەن ۇستازدار بۇل كۇننىڭ ءسان-سالتاناتىن كەلىستىرىپ، سەزىندىرۋ ءۇشىن قولدان كەلگەندى جاسادى. قىرۋار ەڭبەك اتقارىلدى، – دەدى ب ساعىنتايەۆ.

سونداي-اق ول ءتورتىنشى توقساندا ساباقتار قاشىقتان وتكەنىن ايتىپ، وقۋ پروسەسىنىڭ ۇزىلمەۋى ءۇشىن جەدەل ىسكە كىرىسكەندەرىن اتاپ ءوتتى.

– قۇرمەتتى ۇستازدار، وقۋشىلار جانە ولاردىڭ اتا-انالارى! ءبىز قيىن ءساتتى بىرلەسە ەڭسەرە بىلدىك. تاجىريبە جيناقتادىق. بۇل – بولاشاقتاعى زامان سىناعىنا لايىقتى توتەپ بەرۋىمىزگە قاجەت تاجىريبە. بيىلعى تۇلەكتەر مەكتەپتى ونلاين ءتامامداعان پيونەرلەر بولدى. قولايسىز جاعدايدا دا بىلىمگە ەرەكشە قۇشتارلىق تانىتتىڭىزدار. بالالارعا قولداۋ كورسەتكەن اتا-انالارعا مىڭ العىس. ءوز مىندەتتەرىن مۇلتىكسىز اتقارعان مۇعالىمدەرگە راحمەت، – دەپ ايتتى شاھار باسشىسى.

ءسوز سوڭىندا بارشا تۇلەكتەردى سوڭعى قوڭىراۋمەن قۇتتىقتاپ، اق جول تىلەدى.

– قۇرمەتتى تۇلەكتەر! ومىرلەرىڭىزدىڭ جاڭا پاراعىن اشقالى تۇرسىزدار. ءبىلىم كوكجيەگىن كەڭەيتۋگە مۇمكىندىك كوپ. قاي ماماندىقتى تاڭداساڭىز دا، سول ماماندىقتىڭ بىلگىر مامانى بولىپ شىعۋعا تىرىسىڭىزدار. تاباندىلىق – ارمان مەن ماقساتىڭا اپارار العاشقى قادامىڭ. وقۋشىنىڭ جەتىستىگى – ۇستازدىڭ ابىرويى، ەڭبەگىنىڭ ناتيجەسى. اق جول!، – دەدى ب. ساعىنتايەۆ.