جاقىندا عانا پارتيا قۇراتىنىن ايتىپ، پارتياسىنىڭ اتىن "سەن الاش" دەپ جاريالاعان كاسىپكەر، مەدياترەنەر احمەتبەك نۇرسيلانىڭ ايتۋىنشا، پارلامەنت سايلاۋى مەرزىمىنەن بۇرىن ءوتۋى دە، ءوز ۋاقىتىندا بولۋى دا مۇمكىن. بۇل تۋرالى كاسىپكەر قامشى تىلشىسىنە تەلەفون ارقىلى بىلدىرگەن پىكىرىندە ايتتى. 

– مەن "بولادى، نە بولمايدى" دەگەن بولجامدى ونشا جاقسى كورمەيمىن. پارلامەنت سايلاۋى مەرزىمىنەن بۇرىن ءوتۋى دە مۇمكىن نەمەسە ءوزىنىڭ ۋاقىتىندا ءوتۋى دە ىقتيمال. توقايەۆ كوپتەگەن رەفورمالار جاساپ جاتىر. پرەزيدەنتكە ءوزىنىڭ رەفورماسىن قولدايتىن ادامدار كوبىرەك كەرەك دەپ ويلايمىن. قازىرگى پارلامەنتتەگى ادامدار پرەزيدەنتتىڭ رەفورمالارىن تولىقتاي قولداي بەرمەۋى مۇمكىن. سول ءۇشىن جاڭا قان قۇيىلىپ، جاڭا قۇرام كەلۋى كەرەك دەپ ەسەپتەيمىن، – دەيدى كاسىپكەر.

پارتيانىڭ ىنتالى توبىن تىركەۋگە قاجەتتى مىڭ ادامنىڭ دايىن تۇرعانىن ايتقان مەدياترەنەر ولاردى تىركەۋمەن اينالىسۋدى باستاپ جاتقانىن جەتكىزدى.

– مىڭ ادامنىڭ ءتىزىمى، اتى-جونىمەن دايىن تۇر. تىزىمدەرىن دۇرىستاپ جاتىرمىز، – دەدى ول.

احمەتبەك نۇرسيلانىڭ سوزىنشە، ادەتتە بارلىق پارتيالاردىڭ باعدارلامالارى ۇقساس كەلەدى.

– پارتيالاردىڭ كوبى ادىلەتتى سايلاۋ جۇيەسىن قۇرۋ، ادىلەتتى سوت دەگەن باعىتتى ايتادى. ال مەنىڭ باعدارلامامداعى باسىم باعىت – ەلدى يندۋستريالاندىرۋ، ەلدىڭ ءبىلىم بەرۋ جۇيەسىنە رەفورما جاساۋ جانە ەكونوميكانى كوتەرۋ. ەلدەگى جەمقورلىقتى جويمايىنشا، ەلدىڭ ەكونوميكاسى كوتەرىلمەيدى. ۇلكەن كەدەرگى – وسى، – دەيدى كاسىپكەر. 

ءتۇرلى كانالدار اشىپ، قازاقستان ەكونوميكاسى جايىندا ءدارىس وقىپ جۇرگەنىن ايتقان احمەتبەك نۇرسيلا "قازاقستان ەكونوميكاسى بۇگىن نەگە وسىنداي جاعدايدا، وعان نە سەبەپ جانە ودان شىعۋدىڭ جولى قانداي؟" دەگەن تاقىرىپتارعا جاۋاپ بەرەتىنىن مالىمدەدى.

– مەن ەگەر پارلامەنتكە بارسام، وسى ارقىلى دۇرىس ەكونوميكالىق دامۋ مودەلىن ۇسىناتىن بولامىن، – دەيدى مەدياترەنەر.