اياۋسىز سوققى جىعىلعان بۋرابايدىڭ ەكس-اكىمى شىڭعىسحان تەمىربەكوۆ قايتىس بولدى. بۇل تۋرالى اقمولا وبلىسىنىڭ پوليسيا دەپارتامەنتى حابارلادى.
23 مامىردا الەۋمەتتىك جەلىدە ەكس-اكىمنىڭ تەمىرمەن سوققىعا جىعىلعانى تۋرالى اقپارات تاراعان بولاتىن. تەمىربەكوۆتىڭ تۋىستارى ۇندەۋ جاساپ وقيعانىڭ "زەلەنىي بور" اۋدانىندا بولعانىن ايتقان.
"تەمىربەكوۆتىڭ دەنساۋلىعىنا اۋىر زاقىم كەلۋىنە بايلانىستى بيىل 23 مامىردا ق ر قىلمىستىق كودەكسىنىڭ 106-بابى بويىنشا سوتقا دەيىنگى تەرگەۋ باستالدى. 25 مامىردا كۇدىكتى ايىپتى دەپ تانىلىپ، بۋراباي اۋدانىنىڭ ۋاقىتشا ۇستاۋ يزولياتورىنا قامالدى. 27 مامىردا بۋراباي اۋداندىق سوتى كۇدىكتىگە قاتىستى ءۇي قاماۋىنا الۋ تۋرالى شەشىم شىعاردى" دەلىنگەن حابارلامادا.
اقمولا وبلىسىنىڭ پوليسيا دەپارتامەنتى قايتىس بولعان ەر ادامنىڭ بۋرابايدىڭ ەكس-اكىمى بولعانىن راستادى.
