بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا قالانىڭ مەملەكەتتىك باس سانيتار دارىگەرى جانداربەك بەكشين ايتتى.

ەسكە سالساق، ءبىرقاتار كاسىپورىندار ءوز جۇمىستارىن قايتادان باستادى. الماتى قالاسىنىڭ اكىمى باقىتجان ساعىنتايەۆتىڭ باستاماسىمەن ءاربىر اۋداندىق اكىمدىكتەردە كاسىپكەرلىك سۋبەكتىلەردىڭ سانيتارلىق-ەپيدەميولوگيالىق تالاپتاردى ساقتاۋىن قاداعالاۋ بويىنشا مونيتورينگتىك توپتار قۇرىلعان.

بەكىتىلگەن مونيتورينگتىك توپتاردىڭ قۇرامىنا الماتى قالاسىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى ماماندارى، الماتى قالاسىنىڭ كاسىپكەرلىك جانە ينۆەستيسيالار باسقارماسىنىڭ وكىلدەرى، اۋداندىق اكىمدىكتەردىڭ، «اتامەكەن» ۇكپ جانە پوليسيا دەپارتامەنتىنىڭ قىزمەتكەرلەرى ەنگەن.

مونيتورينگتىك توپتار كارانتين كەزىندە جۇمىسىن قايتادان باستاعان بارلىعى 1989 نىساندى قامتىدى.

– ءبىز 2 مىڭنان استام تەكسەرۋ جۇرگىزدىك، ونىڭ بارىسىندا تەك 65 جاعداي بويىنشا اكىمشىلىك جازا تاعايىندالدى جانە 39 نىساننىڭ قىزمەتى توقتاتىلدى. سەنبى جانە جەكسەنبى كۇندەرى ءبىز 153 نىساندى تەكسەردىك. تەكسەرۋ شارالارى جالعاسادى، – دەدى الماتىنىڭ باس سانيتار دارىگەرى.

ءوز مىندەتتەرىنە سالعىرت قاراعان مىنا تىزىمدەگى ءدامحانالار مەن مەيرامحانالار باسشىلىعىنا اكىمشىلىك ايىپپۇل سالىندى، ولار: «جان پلوۆ لاگمان» مەيرامحاناسى، «شاشلىچنايا نا كيروۆا»، «شاشلىچنىي دۆور»، «بورجومي»، «الماتى» ءدامحانالارى، سونىمەن بىرگە، «بايتاس» شاعىن ماركەتى، ال «ديلناز»، «شاپاعات» ءدامحانالارىنا اكىمشىلىك حاتتاما تولتىرىلدى. «پروۆانس» ءدامحاناسىنىڭ قىزمەتى توقتاتىلدى.