بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن جالپى وتىرىس ءوتتى. وندا دەپۋتاتتاردىڭ وزدەرى باستاماشى بولعان اۋىلدى ساپالى ينتەرنەتپەن قامتۋ تۋرالى زاڭ جوباسى ءبىرىنشى وقىلىمدا ماقۇلداندى.
اتالعان زاڭ جوباسىندا ەلدى مەكەندەردى ۇيالى بايلانىسپەن قامتىپ، جەلىنىڭ ساپاسىن ارتتىرۋ ءۇشىن بايلانىس وپەراتورلارىنا تەلەكوممۋنيكاسيالىق ينفراقۇرىلىمدى بىرلەسىپ پايدالانۋ ۇسىنىلادى.
وسى جونىندە ءماجىلىس ءتوراعاسى نۇرلان نىعماتۋلين:
– ەلىمىزدىڭ سيفرلىق دامۋ جولىندا ينتەرنەت ماسەلەسىنىڭ باستى نازاردا ەكەنىن وزدەرىڭىز جاقسى بىلەسىزدەر. اسىرەسە، اۋىلدى جەرلەردى ساپالى ينتەرنەتپەن قامتاماسىز ەتۋ بۇگىنگى كۇننىڭ باستى تالابى. سەبەبى، مەملەكەت باسشىسى قاسىم-جومارت كەمەل ۇلى توقايەۆ ۇلتتىق قوعامدىق كەڭەس وتىرىسىندا ءبىلىم جانە دەنساۋلىق سالالارىن زامانعا ساي رەفورمالاۋ تۋرالى ايتقان بولاتىن. وسى جولدا، ارينە، سيفرلىق جانە ەلەكتروندىق قىزمەتتەردىڭ قاجەتتىلىگى وتە ماڭىزدى، – دەدى.
نۇرلان نىعماتۋلين اتاپ وتكەندەي، وسى زاڭ جوباسى اۋىل تۇرعىندارىن ساپالى جانە قولجەتىمدى ينتەرنەتپەن قامتاماسىز ەتۋگە جاڭا سەرپىن بەرەتىنى ءسوزسىز.
جالپى بۇل قۇجات اۋىلدىق ەلدى مەكەندەردى ينتەرنەتكە كەڭجولاقتى قولجەتىمدىلىكپەن قامتاماسىز ەتۋ ماقساتىندا ازىرلەنگەن.
سونىمەن قاتار، بايلانىس وبەكتىلەرىن سالۋ كەزىندە جەر ۋچاسكەلەرىن رەسىمدەۋ بويىنشا رۇقسات بەرۋ راسىمدەرىن وڭايلاتۋعا جانە بايلانىس وپەراتورلارىنىڭ بارلىعىنا تەلەكوممۋنيكاسيالىق ينفراقۇرىلىمعا تەڭ قول جەتكىزۋ مۇمكىندىگىن بەرۋگە باعىتتالعان.
ءماجىلىس اپپاراتىنىڭ باسپا ءسوز قىزمەتى
پىكىر قالدىرۋ