الماتى قالاسى مەكتەپتەرىنىڭ بىرىندە 11 جىل وقىپ، بۇگىن عانا بىتىرگەنى تۋرالى كۋالىك العان وقۋشى ءوزىنىڭ "التىن بەلگىسىن"  200 مىڭ تەڭگەگە ساتپاقشى. جاس تۇلىك OLX ساتۋ-الۋ قوسىمشاسىنا "التىن بەلگىسىن" ساتاتىن تۋرالى حابارلاندىرۋ جاريالاعان. 

"التىن بەلگىنى" بۇگىن عانا الدىم (2020 جىل)، شىنايى بەلگى، دالەلدەي الامىن (قۇجاتتارى بار)، سالماعى – 23 گرامم، ەگەر قىزىقتارىپ جاتسا، جازىڭىزدار" دەلىنگەن حابارلاندىرۋدا.

قامشى ءتىلشىسى "التىن بەلگىسىن" ساتىلىمعا شىعارعان جاس تۇلەكپەن WhatsApp مەسسەندجەرى ارقىلى ساتىپ الۋشى رەتىندە حات الماسىپ كوردى. 

– "التىن بەلگى" قولىمدا تۇر. بۇگىن عانا الدىم. اقشا كەرەك بولىپ تۇر، ونىڭ ۇستىنە بۇل ءتوس بەلگىنىڭ قاجەتى شامالى. ءبىلىم ادامنىڭ وزىندە بولسا جەتكىلىكتى ەمەس پە. نەبارى 30 مينۋتتىڭ ىشىندە ەكى ادام حابارلاسىپ، قىزىعۋشىلىق تانىتتى، باعاسىن 170 000 تەڭگەگە ءتۇسىرىپ بەرە الامىن، – دەيدى «التىن بەلگى» يەگەرى.

11 جىل بويى ۇزدىك وقىپ، وقۋشىلاردىڭ الدىڭعى قاتارىندا بولىپ، بىتىرگەن ساتتە العان ماراپاتتى، ياعني "التىن بەلگىنى" ساتۋ قانشالىقتى زاڭدى؟ وسى ماسەلە بويىنشا Qamshy.kz اقپارات اگەنتتىگى ءبىلىم جانە عىلىم مينيسترلىگىنە رەسمي ساۋال جولدادى.

♦وقي وتىرىڭىزدار: مينيسترلىك "التىن بەلگىنى" ساتۋ ماسەلەسىن مۇلدەم قۇپتامايدى