شىمكەنتتە توبەلەستەن كەيىن قايتىس بولعان 17 جاستاعى بوزبالانىڭ ولىمىنە قاتىسى بولۋى مۇمكىن ادام ىزدەستىرىلىپ جاتىر. بۇل تۋرالى استانا تەلەارناسى حابارلادى.
پوليسيا كۇدىكتىنىڭ كامەلەت جاسىنا تولماعانىن حابارلادى. بۇعان دەيىن سۇحبات بەرمەي كەلگەن قۇقىق قورعاۋ ورگانىنىڭ وكىلدەرى بۇگىن ارنايى بريفينگ وتكىزدى. شىمكەنتتىڭ باس پوليسەيى ەرالى جۇماحانبەتوۆ بۇل قىلمىستى ءوز باقىلاۋىنا العانىن جەتكىزدى.
ايتا كەتەيىك، جابىرلەنۋشى تاراپ وزدەرىنە 20 ادام جابىلعانىن ايتقان. ءبىراق بۇگىن قۇزىرلى ورىن وكىلدەرى بۇزىقىلاردىڭ سانى توعىز دەپ وتىر. پوليسەيلەر توبەلەسكە قاتىسقان بەس كۇدىكتىنىڭ قاماۋدا وتىرعانىن، وزگەسى ەشقايدا شىقپاۋ تۋرالى قولحاتپەن بوساتىلعانىن مالىمدەدى.
– ەڭبەكشىقازاق پوليسيا باسقارماسى 3 ماۋسىمدا بالالار اۋرۋحاناسىنىڭ دارىگەرلەرىنە قاتىستى ق ر قىلمىستىق كودەكسىنىڭ 317-بابى بويىنشا قىلمىستىق ءىس قوزعادى، – دەدى شىمكەنت قالالىق پوليسيا دەپارتامەنتىنىڭ باسشىسى ەرالى جۇماحانبەتوۆ.
سونىمەن قاتار، دارىگەرلەرگە قاتىستى دا قىلمىستىق ءىس قوزعالعان. دەپارتامەنت باستىعى بۇعان مارقۇمنىڭ تۋىستارىنىڭ الەۋمەتتىك جەلىلەردە دارىگەرلەر ىسىنە كوڭىلى تولمايتىنىن ايتقان جازبالارى نەگىز بولعانىن دايەك قىلدى. ەسكە سالايىق، شىمكەنتتىڭ ىرگەسىندەگى ماياتاس اۋىلىنىڭ كامەلەت جاسىنا تولماعان بالالارى اراسىنداعى كيكىلجىڭنەن ءبىر وتباسى قارا جامىلدى. 17 جاستاعى بوزبالا باسىنان العان اۋىر سوققىدان ون كۇندەي ەس-تۇسسىز جاتىپ، اۋرۋحانا كوز جۇمدى.
پىكىر قالدىرۋ