مەملەكەت جانە قوعام قايراتكەرى، ساياساتتانۋشى بەرىك ءابدىعالي ۇلى پرەزيدەنت توقايەۆتىڭ ساياسي قۋعىن-سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋ تۋرالى تاپسىرماسى تاريحي ادىلدىكتى ورناتۋعا سەپ بولادى دەگەن پىكىردە.
– مەن بۇعان دەيىن دە وسى ماسەلەنى تەرەڭىرەك زەرتتەۋ كەرەكتىگىن ايتىپ، پىكىر ءبىلدىرىپ ءجۇردىم. پرەزيدەنتتىڭ بۇل مالىمدەمەسىن قوس قولداپ قولدايمىن دەگىم كەلەدى. قازىرگى ۋاقىتتا اشارشىلىق كەزىندە قازا تاپقان ادامداردىڭ سانى دا ناقتى ەمەس. بىرەۋ 1 ملن دەيدى، ەندى ءبىرى ودان دا كوپ دەپ جاتادى. ەڭ الدىمەن قانشا ادامنىڭ قازا تاپقانىن ءبىلۋىمىز كەرەك. بۇعان دەيىن دە ارحيۆتەر اشىلىپ، زەرتتەلۋى كەرەك ەدى. ۋكراينا اشارشىلىق كەزىندەگى مالىمەتتەردىڭ بارلىعىن دەرلىك زەرتتەپ، ءبىلىپ الدى. ءبىز شەجىرەلەرىمىزدى زەرتتەسسەك كوپتەگەن مالىمەت جينايمىز دەپ ويلايمىن. ەندى قازاقستان الداعى تاۋەلسىزدىكتىڭ 30 جىلدىعىنا وراي تاريحي ادىلدىك ورنايدى دەپ سەنەمىز، – دەيدى بەرىك ءابدىعالي ۇلى.
سونداي-اق ساياساتتانۋشى تاريحي عىلىمداردىڭ دوكتورى دارحان ءقىدىرالىنىڭ "اشارشىلىق قۇرباندارىن ەسكە الاتىن ارنايى كۇن بەلگىلەنگەنى ءجون" دەگەن باستاماسى وتە ورىندى ەكەنىن ايتتى.
– بۇل دا قۇپتارلىق ۇسىنىس. اشارشىلىق پەن قۋعىن-سۇرگىن تاريحي تۇرعىدا جاقىن ۋاقىتتا بولعانىمەن، ەكەۋىن ەكى بولەك قاراستىرىپ، زەرتتەسە قۇبا-قۇپ بولار ەدى. ويتكەنى ەكى ماسەلە دە تەرەڭ ءۇڭىلۋدى، اقتاڭداقتاردى اشۋدى قاجەت ەتەدى. سونىڭ ىشىندە حالقىمىزعا ۇلكەن ناۋبەت بولعان اشارشىلىقتىڭ شىندىعىن تولىقتاي اشۋ، قانشا قازاقتىڭ قازا تاپقانىن انىقتاۋ – كەزەك كۇتتىرمەيتىن ماسەلە، – دەپ ءسوزىن تۇيىندەدى قوعام قايراتكەرى.
پىكىر قالدىرۋ