الماتى قالاسىندا كوروناۆيرۋس ەپيدەمياسىنا قارسى كۇرەس شارالارىنا 9 ميلليارد تەڭگەگە جۋىق قارجى بولىنگەن. ونىڭ 5،5 ميلليارد تەڭگەدەن استامى كوروناۆيرۋسقا قارسى كۇرەسىپ جاتقان دەنساۋلىق ساقتاۋ نىساندارى قىزمەتكەرلەرىنىڭ جالاقىسىنا قوسىمشا ۇستەماقى رەتىندە قاراستىرىلعان. بۇل تۋرالى «الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالى حابارلادى.

حابارلاماعا سۇيەنسەك، ۆيرۋسقا قارسى كۇرەسكە جۇمىلدىرىلعان مەديسينا نىساندارىنىڭ ءتىزىمىن الماتى اكىمدىگىندەگى ارنايى كوميسسيا بەكىتكەن. بەكىتىلگەن تىزىمگە سايكەس، ءساۋىر ايى ءۇشىن مەديسينا ماماندارىنا تولەنەتىن ۇستەماقى 1،5 ميلليارد تەڭگەنى قۇرادى. جالپى العاندا:

ءقاۋىپ دەڭگەيى اسا جوعارى 1-توپقا – 472،1 ملن.تەڭگە (880 ادام)؛

ءقاۋىپ دەڭگەيى جوعارى 2-توپقا – 755،3 ملن.تەڭگە (2293 ادام)؛

ءقاۋىپ دەڭگەيى ورتاشا 3-توپقا – 289،8 ملن.تەڭگە (2308 ادام).

ونىڭ ىشىندە:

1. ستاسيونارلىق ۇيىمدار (سونىڭ ىشىندە شۇعىل ستاسيونارلاردىڭ قابىلداۋ بولىمدەرى) – 757،7 ملن.تەڭگە (2279 ادام)؛
2. جەدەل جاردەم قىزمەتى – 626،7 ملن.تەڭگە (2113 ادام)؛
3. باستاپقى مەديسينالىق-سانيتارلىق كومەك ۇيىمدارى نەمەسە ەمحانالار (بلوك-بەكەتتەر، فيلترلەر، ءموبيلدى بريگادالار، 4-ساناتتى شاقىرتۋلارعا بارعا ماماندار) – 132،8 ملن.تەڭگە (1089 ادام).

ماۋسىمنىڭ بىرىندەگى مالىمەت بويىنشا، الماتىلىق 5398 مەديسينا قىزمەتكەرىنىڭ جالاقىسىنا قوسىمشا اقى رەتىندە 1،5 ميلليارد تەڭگە تولەنگەن، – دەدى مسق الماتى فيليالى باسشىسى تىلەۋحان ابىلدايەۆ.

ونىڭ ايتۋىنشا، قازىرگى تاڭدا قالادا ەپيدەمياعا قارسى ءىس-شارالارعا 86 دەنساۋلىق ساقتاۋ نىسانى جۇمىلدىرىلعان.

ەستەرىڭىزگە سالا كەتسەك، قوسىمشا تولەمدەر دەنساۋلىق ساقتاۋ سالاسى قىزمەتكەرىنىڭ ومىرىنە توندىرەتىن ءقاۋىپ دەڭگەيىنە قاراي تولەنەدى. 

• ءبىرىنشىسى – ءقاۋىپ دەڭگەيى اسا جوعارى توپ. وعان ينفەكسيالىق ستاسيونارلار مەن جانساقتاۋ بولىمدەرىنىڭ دارىگەرلەرى، اعا جانە ورتا بۋىن مەديسينا قىزمەتكەرلەرى جاتادى.
• ەكىنشىسى – ءقاۋىپ دەڭگەيى جوعارى توپ. وعان پروۆيزورلىق ستاسيونارلاردا جۇمىس ىستەيتىن ماماندار، جەدەل مەديسينالىق جاردەم، سانيتارلىق اۆياسيا قىزمەتىنىڭ دارىگەرلەرى مەن فەلدشەرلەرى كىرەدى.
• ءۇشىنشىسى – ءقاۋىپ دەڭگەيى ورتاشا توپ. وعان كارانتيندىك ستاسيونارلاردىڭ دارىگەرلەرى، ورتا جانە كىشى مەديسينا قىزمەتكەرلەرى، سانيتارلىق دارىگەرلەر (مەملەكەتتىك قىزمەتكەرلەر)، جەدەل جاردەم كولىگىنىڭ جۇرگىزۋشىلەرى ت.ب. جاتادى.