قازاقستاننىڭ تۇڭعىش پرەزيدەنتى نۇرسۇلتان نازاربايەۆقا ءتىل تيگىزدى دەلىنگەن قاراعاندى ​​تۇرعىنى ارمان حاسەنوۆقا قاتىستى ۇكىم شىقتى، دەپ حابارلادى قازتاگ.

– كەشىرىڭىز، ەندى بۇلاي قايتالامايمىن ... ەلباسى نۇرسۇلتان نازاربايەۆتان كەشىرىم سۇرايمىن. مەن جۇمىس تاۋىپ، قوعامعا پايدامدى تيگىزۋگە ۋادە بەرەمىن، – دەدى ا. حاسەنوۆ.

ءىس ق ر قىلمىستىق كودەكسىنىڭ 373-بابىنىڭ 2-بولىگى بويىنشا (كوپشىلىك الدىندا قورلاۋ جانە تۇڭعىش پرەزيدەنتتىڭ ار-نامىسى مەن قادىر-قاسيەتىنە قول سۇعۋ) قاراعاندى قالاسىنىڭ قازىبەك بي اۋداندىق سوتىندا قارالدى.

– حاسەنوۆ جاساعان ىس-ارەكەتىنە شىن جۇرەكتەن وكىنەتىنىن ايتىپ، ءوز كىناسىن تولىقتاي مويىندادى، سوت ونى قوعامنان وقشاۋلاماي-اق تۇزەتۋ جانە قايتا تاربيەلەۋ مۇمكىن دەپ سانايدى. حاسەنوۆ ارمان قايرات ۇلى ق ر قك 373-بابىنىڭ 2-بولىگى بويىنشا كىنالى دەپ تايۋىلىپ، وعان پروباسيالىق (سىناق مەرزىمى) باقىلاۋ نەگىزىندە 3 جىلعا باس بوستاندىعىنان ايىرۋ جازاسى تاعايىندالدى، – دەپ ۇكىم شىعارعان سۋديا مانات جۇماقايەۆا.

ەسكە سالايىق، 13 ماۋسىمدا قازاقستاننىڭ ۇلتتىق قاۋىپسىزدىك كوميتەتى جەلىگە مازمۇنى ءبىرجاقتى روليك جۇكتەگەن قاراعاندى ​​تۇرعىنىنىڭ ۇستالعانى تۋرالى حابارلاعان بولاتىن.