الماتى قالاسى كاسىپكەرلىك جانە ينۆەستيسيا باسقارماسىنىڭ باسشىسى ەركەبۇلان ورازالين وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا "باراحولكا" جابىلادى" دەگەن اقپاراتقا پىكىر ءبىلدىردى.
بۇعان دەيىن الەۋمەتتىك جەلىلەر مەن WhatsApp-تا "باراحولكانىڭ" ساتۋشىلارى بازار جابىلاتىنى تۋرالى ەسكەرتۋ العانى جونىندە اقپارات تاراعان.
الماتى بازارلارىنىڭ جابىلاتىنى تۋرالى اقپارات جالعان. دەسە دە جۇمىسىنا رۇقسات ەتىلگەن بارلىق كاسىپكەرلىك نىساندارعا سانيتارلىق قاۋىپسىزدىكتى ساقتاۋعا باعىتتالعان كارانتيندىك تالاپ كۇشەيتىلەدى. ۆەدومستۆو باسشىسىنىڭ ايتۋىنشا، ءقازىر كارانتين شارالارىن جەڭىلدەتۋ جانە ءبىرقاتار نىسانداردى اشۋعا رۇقسات بەرۋ ارقاسىندا الماتىدا 800 مىڭ جۇمىس ورنى قايتا جاندانعان.
– بۇل باعىتتا سانيتارلىق-ەپيدەميولوگيالىق قىزمەتى بەلسەندى جۇمىس جۇرگىزۋدە. ەگەر كارانتين تالاپتارى بۇزىلعانى انىقتالسا، ءيا، وندايدا كەيبىر نىساندار جابىلۋى مۇمكىن، سونداي-اق اۋرۋ جۇقتىرعان ادامدار انىقتالعان جاعدايدا، – دەدى ەركەبۇلان ورازالين.
پىكىر قالدىرۋ