پوليسيا قىزمەتكەرىنىڭ قۇلاعىن تىستەپ العان پاۆلودارلىق تۇرعىن بەستەن ون جىلعا دەيىن سوتتالۋى مۇمكىن. بۇل تۋرالى وبلىستىق پوليسيا دەپارتامەنتى حابارلادى. كەلەڭسىز وقيعا دەمالىس كۇنى وبلىس ورتالىعىنداعى كوپ قاباتتى ۇيلەردىڭ ەسىك الدىندا بولعان، دەپ جازادى استانا تەلەارناسى. 

جاريالانعان بەينەجازبادا پاۆلودارلىق تۇرعىننىڭ وتباسىمەن تۇرعانىن، ءارى وتاعاسىنىڭ الدەنەنى ءىشىپ تۇرعانىن انىق بايقاۋعا بولادى. كەيىن ولاردىڭ قاسىنا ءتارتىپ ساقشىسى جاقىنداپ، كۋالىگىن كورسەتەدى. ال ولار پوليسەيدىڭ قولىنداعى قۇجاتتى قاعىپ جىبەرەدى. ارتىنشا ولار جاعا جىرتىسقان. پوليسەي جاراقات العان. وقيعا كۋاگەرى ءتارتىپ بۇزىشىنىڭ – ايەلى. ونىڭ ايتۋىنشا، كۇيەۋى ىشىمدىك ىشكەنىمەن، ماس بولماعان. 

– پوليسيا قىزمەتكەرى جولداسىمدى بالامەن بىرگە قاتتى يتەرىپ جىبەردى. سول ساتتە بالام باسىمەن ءۇيدىڭ قابىرعاسىنا سوعىلدى. ول نەبارى 7 ايلىق عانا. سوسىن جەدەل جاردەم شاقىرىپ، اۋرۋحاناعا باردىق. بالامنىڭ باسىنا زاقىم كەلگەن. قولىمدا انىقتامام دا بار، – دەيدى انگەلينا چەپۋرنايا.

پوليسيا دەپارتامەنتىنىڭ مالىمەتىنشە، جانجالعا تۇرعىننىڭ قوعامدىق ورىندا ىشىمدىك ىشكەنى سەبەپ بولعان. ونىمەن قويماي ول ءتارتىپ ساقشىسىنا دورەكى مىنەز كورسەتىپ، بيلىك وكىلىن سوققىعا جىققان.

قازىرگى ۋاقىتتا قىلمىسكەر قاماۋعا الىنىپ، ق ر قىلمىستىق كودەكسىنىڭ 380-بابىنىڭ 2-بولىگى بويىنشا ءىس قوزعالىپتى.

– پوليسيا قىزمەتكەرى شابۋىل جاساۋشىعا ەشقانداي قارسى ارەكەت جاساپ نەمەسە قورعانىس قۇرالدارىن قولدانعان جوق. سەبەبى شابۋىلداۋشىنىڭ قولىندا بالاسى بولدى. سول سەبەپتەن پوليسەي ءوز-وزىن تەك سوققىدان عانا قورعاپ قيمىل جاسادى. ءتىپتى، ۆيدەودا شابۋىلداۋشى ونى سوققىلاپ جاتسا دا، بالانى قورعاۋ ءۇشىن ارەكەت ەتىپ، ۇستاپ قالعانى كورىنەدى. ال شابۋىلداۋشى پوليسەيدى ۇرىپ، اياقپەن تەۋىپ، قۇلاعىن تىستەپ دەنە جاراقاتىن سالدى، – دەيدى وبلىستىق پوليسيا دەپارتامەنتىنىڭ باسشىسى نۇرلان ءماسىموۆ.

توبەلەستىڭ شىعۋىنا پوليسەيدىڭ كىناسىنىڭ بار-جوعى انىقتالماق. ول ءۇشىن قىزمەتتىك تەكسەرۋ باستالىپتى. پوليسيا بۇزاقىنىڭ بۇعان دەيىن دە قىلمىسى ءۇشىن سوتتى بولعانىن ايتادى. ەگەر ونىڭ كىناسى دالەلدەنسە، 5 جىلدان 10 جىلعا دەيىن باس بوستاندىعىنان ايىرىلۋى مۇمكىن دەيدى.