الماتى پوليسياسى قازاقستاندىق بەلسەندى ءاسيا تولەسوۆانى قىلمىستىق كودەكستىڭ ەكى بابى بويىنشا ايىپتاۋدا، دەپ حابارلادى قازاقستاننىڭ ىشكى ىستەر مينيسترلىگىنىڭ رەسمي ينتەرنەت-رەسۋرسى.

"زاڭسىز ميتينگكە قاتىسقان تولەسوۆا قىزمەتتىك مىندەتىن اتقارىپ جۇرگەن پوليسەيگە قارسى كۇش قولدانعان. تولەسوۆانىڭ زاڭعا قايشى ارەكەتى دالەل رەتىندە ىسكە تارتىلعان بەينەجازبا ماتەريالىندا كورسەتىلگەن. ق ر قك 378 (بيلىك وكىلىن قورلاۋ) جانە 380 (بيلىك وكىلىنە قاتىستى كۇش قولدانۋ) باپتارى بويىنشا سوتقا دەيىنگى تەرگەۋ امالدارى باستالدى"، - دەلىنگەن حابارلامادا.

پوليسەيلەر مالىمدەگەندەي، اتالمىش باپتار ءۇش جىلعا دەيىن باس بوستاندىعىنان ايىرۋدى كوزدەيدى.

"8 ماۋسىمدا كۇدىكتى تولەسوۆا قپك 128-بابى بويىنشا ۇستالىپ، الماتى قالاسى پوليسيا دەپارتامەنتىنىڭ ۋۇي-گە توعىتىلدى"، - دەلىنگەن حاباردا.

ەسكە سالساق، 6 ماۋسىمدا حابارلانعانداي، الماتىداعى ميتينگ كەزىندە ۇستالعاندار اراسىندا "شىندىقتان قاشا المايسىڭ!" اكسياسىنا قاتىسۋشىلاردىڭ ءبىرى ءاسيا تولەسوۆا دا بولعان. كەيىن ول قازتاگ حاا-عا ونى بوساتقاندارىن جانە ءتىپتى حاتتاما دا بەرمەگەندەرىن ايتتى، الايدا كەشكە قاراي بەلگىلى بولعانداي، ونى قايتا ۇستاعان. جانە قايتادان جىبەرگەن. سول كۇنى ءبىرقاتار بلوگەرلەردىڭ الەۋمەتتىك جەلىدەگى پاراقشاسىندا 11 سەكۋندتىق ۆيدەو تاراعان، وندا تولەسوۆا پوليسەيدىڭ باسىنداعى فۋراجكاسىنا ءتيىسىپ جاتقانى كورسەتىلگەن.

7 ماۋسىمدا باسقا بەلسەندى بەيبارىس تولىمبەكتىڭ اناسى ءلاززات تولىمبەك سول كورسەتىلگەن ۆيدەو-ەپيزودقا دەيىن تولەسوۆانىڭ قارتتاردى كۇشتەپ الىپ كەتۋگە كەدەرگى كەلتىرۋگە تىرىسقانى، ءبىراق كۇش قۇرىلىمدارىنىڭ ونى جەرگە يتەرىپ قۇلاتقانى جانە ءتىپتى تۇرۋىنا دا كومەكتەسپەگەندەرى تۋرالى ايتقان. 8 ماۋسىمدا بەلگىلى بولعانداي، تولەسوۆانى كۇدىكتى رەتىندە پوليسياعا شاقىرعان.