بۇل تۋرالى "Nur Otan" پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Instagram پاراقشاسىندا ايتتى.
«قۇرمەتتى دوستار، ەلباسىنىڭ تاپسىرماسىمەن «Birgemiz» قورى ءبىرجولعى تولەماقى بەرۋدىڭ ءۇشىنشى كەزەڭىن جۇرگىزگەنىن حابارلايمىن. شاعىن قالالار مەن اۋىلدارداعى جانە ءىرى قالالارعا ىرگەلەس ەلدى مەكەندەردەگى 110 مىڭنان استام اسا مۇقتاج وتباسى 50 000 تەڭگەدەن الدى.
وسىلايشا، بۇگىنگى تاڭدا نۇرسۇلتان نازاربايەۆتىڭ باستاماسى بويىنشا قۇرىلعان قوعامدىق قور 470 000-نان استام وتباسىنى نەمەسە 1،6 ميلليون قازاقستاندىقتى تىكەلەي اتاۋلى كومەكپەن قامتىدى.
ءبىزدىڭ «Jas Otan» جاستار قاناتىمىز بۇكىل ەل بويىنشا 5 مىڭنان استام ۆولونتەردى جۇمىلدىرىپ، 256 مىڭداي وتباسىعا ازىق-تۇلىك سەبەتتەرىن، ماسكالار مەن ەڭ قاجەتتى زاتتاردى جەتكىزىپ بەردى. حالىقتىڭ قورعانىسى ءالسىز بولىگىنە جاتاتىن 100 مىڭ وتباسىعا 5 ميلليون تەگىن ماسكا ۇلەستىرىلدى.
«Birgemiz» قورى ەسەبىنەن ماقتاارال اۋدانىنداعى سۋ باسۋدان زارداپ شەككەن دوستىق اۋىلىنىڭ تۇرعىندارى ءۇشىن جاڭا ۇيلەر قۇرىلىسى جۇرگىزىلىپ جاتىر. جالپى، توتەنشە جاعدايدىڭ العاشقى كۇنىنەن باستاپ نۇروتاندىقتار ەلىمىزدىڭ بارلىق وڭىرىنەن تۇركىستان وبلىسىنا 1000 توننادان استام ازىق-تۇلىك، كيىم-كەشەك، قۇرىلىس ماتەريالدارى مەن جەكە گيگيەنا قۇرالدارىن جىبەردى.
جەدەل جانە ۇيلەسىمدى جۇمىسى ءۇشىن بارشا پارتيالاستارعا، جاسوتاندىقتارعا، پارتيانىڭ وڭىرلىك فيليالدارىنا شىنايى العىسىمدى بىلدىرەمىن. ەلباسىنىڭ ۇندەۋىنە قولداۋ بىلدىرگەن بارشا مەسەناتتارعا ەرەكشە راقمەت ايتامىن. وسى اپتانىڭ ىشىندە ءبىز پارتيامىزدىڭ ليدەرى نۇرسۇلتان ءابىش ۇلى نازاربايەۆتىڭ العىس حاتتارىن تابىستاۋدى باستايمىز» دەپ جازدى ول.
پىكىر قالدىرۋ