بيىلدان باستاپ ەلدەگى جوعارى وقۋ ورىندارى مەن كوللەدجدەر تۇلەكتەرگە ديپلومدى ەلەكتروندىق فورماتتا بەرەدى. بۇل تۋرالى ق ر ءبىلىم جانە عىلىم ۆيسە-مينيسترى رۇستەم بيعاري ونلاين بريفينگتە ايتتى.

– بيىلدان باستاپ بارلىق جوو-لار مەن كوللەدج تۇلەكتەرى ديپلومدى قاعاز تۇرىمەن عانا ەمەس، ەلەكتروندىق تۇردە الادى. بارلىق ءنورماتيۆتى اكتى قابىلداندى. بۇل نە ءۇشىن قاجەت؟ جۇمىس بەرۋشى مەن ازاماتتاردا ديپلومنىڭ جاساندى ەمەس ەكەنىنە، ساپاسىنا قاتىستى سۇراقتار تۋىنداپ تۇراتىنى جاسىرىن ەمەس. ديپلومىن راستاۋ ءۇشىن جۇمىس بەرۋشى مەن جاس ماماننىڭ كوپ ۋاقىتى كەتەدى. بعم-عا جىل سايىن ديپلومنىڭ زاڭدى ەكەنىن راستاۋ ءۇشىن 500 مىڭعا جۋىق ءوتىنىم كەلەدى. ونى راستاۋ ءۇشىن كوپ ۋاقىت قاجەت، – دەدى رۇستەم بيعاري.

ونىڭ ايتۋىنشا، بۇگىنگى تاڭدا 1992 جىلدان بەرگى 2،5 ميلليون ديپلوم مالىمەتتەر بازاسىنا ەنگىزىلگەن. قازىرگى ۋاقىتتا جوعارى وقۋ ورنىن 1992 جىلعا دەيىن بىتىرگەندەردىڭ تاريحي مالىمەتتەرى جينالىپ جاتىر.

– بيىل ءبىز بارلىق ديپلومدى سيفرلاندىردىق. ءبىلىم جانە عىلىم مينيسترلىگى سايتىنان بازاعا ەنگىزىلگەن ديپلومدى ونلاين رەجيمدە تەكسەرۋگە بولادى. جۇمىس بەرۋشىنىڭ دە، جۇمىسقا تۇراتىن ازاماتتىڭ دا ۋاقىتى مەن اقشاسى ۇنەمدەلەدى. ەندى ديپلومنىڭ زاڭدى ەكەنىن راستاۋ ءۇشىن نوتاريۋسقا بارىپ، اقشا تولەۋدىڭ قاجەتى جوق. جىل سوڭىنا دەيىن بۇل جۇمىستى تولىق اياقتايمىز، – دەيدى ول.