«Nur Otan» پارتياسىنىڭ ورتالىق اپپاراتىندا كوروناۆيرۋسپەن كۇرەس جاعدايىندا مۇقتاج ازاماتتارعا قولداۋ كورسەتۋ بويىنشا «Biz Birgemiz» رەسپۋبليكالىق اكسياسىنا قاتىسقان ەڭ بەلسەندى ۆولونتەرلار ەلىمىزدىڭ تۇڭعىش پرەزيدەنتى نۇرسۇلتان نازاربايەۆتىڭ اتىنان العىس حاتتارمەن ماراپاتتالدى.
تاياۋدا بيلەۋشى پارتيانىڭ ليدەرى قازاقستاندىق ءاربىر ۆولونتەرعا ءوز ىقىلاسىن ءبىلدىرىپ، العىس حاتتارعا قول قويعان ەدى.
«توتەنشە جاعداي كەزىندە «Jas Otan» بۇكىل ەل بويىنشا بەس مىڭنان استام ەرىكتىنى جۇمىلدىردى. ولار دەمالىسسىز جۇمىس ىستەپ، مۇقتاج ادامدارعا كومەك جەتكىزدى. ناعىز پاتريوتتاردىڭ، جاۋاپكەرشىلىگى مول جاس كوشباسشىلاردىڭ جاڭا بۋىنى قالىپتاسقانى قۋانتادى. ولاردىڭ ەڭ بەلسەندىلەرىنە ارنالعان العىس حاتتارعا قول قويدىم»، - دەدى نۇرسۇلتان نازاربايەۆ.
سالتاناتتى شارا بارىسىندا «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك «Jas Otan» جاستار قاناتىنىڭ ۆولونتەرلارى بۇكىل ەل بويىنشا 250 مىڭنان استام وتباسىعا ازىق-تۇلىك سەبەتتەرىن، ماسكالار مەن ەڭ قاجەتتى زاتتاردى جەتكىزىپ بەرگەنىن اتاپ ءوتتى. جاسوتاندىقتار العاشقىلاردىڭ قاتارىندا ماقتاارال اۋدانىنا اتتانىپ، قازىرگى كەزدە 500-دەن اسا جاس سۋ باسۋدان زارداپ شەككەن اۋىل تۇرعىندارىنا اقىسىز كومەك كورسەتۋدى جالعاستىرىپ جاتىر.
«وزدەرىڭىز بىلەتىندەي، ەلباسىنىڭ باستاماسىمەن «Nur Otan» پارتياسى مەملەكەت باسشىسىنىڭ قولعا العان داعدارىسقا قارسى شارالارىنا قوسىمشا مۇقتاج قازاقستاندىقتارعا قارقىندى كومەك كورسەتىپ جاتىر. نۇرسۇلتان نازاربايەۆتىڭ باستاماسىمەن قۇرىلعان «Birgemiz» قورىنىڭ جەلىسى بويىنشا مەسەناتتاردىڭ قولداۋىمەن 470 مىڭنان استام وتباسى 50 مىڭ تەڭگەدەن ءبىرجولعى تولەماقى الدى. تۇڭعىش پرەزيدەنت قورىمەن بىرگە اسا مۇقتاج وتباسىلارعا اتاۋلى قولداۋ كورسەتۋ ۇيىمداستىرىلدى. وسىناۋ جۇمىستاردى اتقارۋدا ۆولونتەرلارىمىزدىڭ ءرولى زور بولدى. بۇل رەتتە 2019 جىلدى نۇرسۇلتان ءابىش ۇلى «جاستار جىلى» دەپ اتاسا، ال 2020 جىلدى ەل پرەزيدەنتى قاسىم-جومارت كەمەل ۇلى توقايەۆتىڭ «ۆولونتەر جىلى» دەپ جاريالاۋى سيمۆولدىق مانگە يە بولدى. سىزدەر ءوز وتانشىلدىقتارىڭىزدى، ازاماتتىق پەن جاناشىرلىقتارىڭىزدى تانىتا وتىرىپ، بۇكىل قازاقستاندىق جاستارعا ۇلگى كورسەتتىڭىزدەر»، - دەدى باۋىرجان بايبەك.
سونىمەن بىرگە ءتوراعانىڭ ءبىرىنشى ورىنباسارى جاستاردى الداعى پارترياىشىلىك تاڭداۋ – پرايمەريزگە قاتىسۋعا شاقىردى.
«وتكەن اپتادا پارتيا ليدەرى بيىلعى 17 تامىزدان 3 قازانعا دەيىنگى ارالىقتا پرايمەريز وتكىزۋ تۋرالى قاۋلىعا قول قويدى. ءبىزدىڭ ماقساتىمىز – الداعى ءماجىلىس پەن بارلىق دەڭگەيدەگى ءماسليحاتتارعا سايلاۋلارعا پارتيالىق تىزىمدەر قالىپتاستىرۋ ءۇشىن جاڭا ليدەرلەردى انىقتاۋ بويىنشا بارىنشا اشىق ءارى باسەكەلەستىك نەگىزدە ىرىكتەۋ وتكىزۋ. بۇل رەتتە 35 جاسقا دەيىنگى جاستارعا – 20%، ال ايەلدەر ءۇشىن – 30% كۆوتا كوزدەلگەن. وسى ارقىلى ءبىز دارىندى دا باستاماشىل جاستارىمىز ءۇشىن پارتيالىق «الەۋمەتتىك ءليفتىنى» قامتاماسىز ەتپەكپىز»، – دەدى باۋىرجان بايبەك.
وسى اپتانىڭ ىشىندە نۇرسۇلتان نازاربايەۆتىڭ اتىنان العىس حاتتارمەن ءۇش مىڭداي قازاقستاندىقتى ماراپاتتاۋ جوسپارلانعانىن اتاپ وتكەن ءجون. ولاردىڭ اراسىندا پارتيانىڭ وڭىرلىك فيليالدارىنىڭ ۆولونتەرلارى مەن بەلسەندىلەرى، سونداي-اق قايىرىمدى مەسەناتتار بار.
«توتەنشە جاعداي رەجيمى ەنگىزىلگەن كەزدە كوپتەگەن ادامدار قيىن جاعدايعا تاپ بولدى. مەنىڭ ولارعا قانداي دا ءبىر كومەك بەرگىم كەلدى. الەۋمەتتىك جەلىلەردەن «Nur Otan» پارتياسى مۇقتاج ازاماتتارعا ازىق-تۇلىك جەتكىزىپ بەرىپ جاتقانىن جانە بۇل ىسكە كومەك بەرەتىن ەرىكتىلەر قاجەت ەكەندىگىن بىلگەننەن كەيىن مەن بىردەن حابارلاستىم. «Biz Birgemiz» سەكىلدى اۋقىمدى اكسياعا قاتىسقانىما شەكسىز ريزامىن» - دەپ، ۆولونتەر ەلميرا ايعالييەۆا ءوز اسەرىمەن ءبولىستى.
«Jas Otan» جاستار قاناتى بەلسەندىلەرىنىڭ ءبىرى سەرگەي ماتيۋشەنكو ءوز كەزەگىندە ەلباسىنىڭ العىس حاتىن الۋ ەرەكشە مارتەبە ەكەنىن جانە ادامدارعا كومەك كورسەتۋگە قوسىمشا كۇش-جىگەر سىيلايتىنىن اتاپ ءوتتى.
«ەلىمىز ءۇشىن وسىناۋ كۇردەلى ۋاقىتتا «Nur Otan» پارتياسى بارشا اقجۇرەك ازاماتتار مەن جاستاردى بىرىكتىرە وتىرىپ، جۇرتقا ءوزىنىڭ جاۋاپكەرشىلىكتى ارقالاپ، حالىقتىڭ قامىن ويلايتىن ساياسي كۇش ەكەندىگىن كورسەتە ءبىلدى. الداعى پرايمەريز - «Nur Otan»-نىڭ جاستارعا ءوز قابىلەتتەرىن اشۋلارى ءۇشىن ناقتى جاعداي جاساپ وتىرعانىنا تاعى دا ءبىر دالەل»، - دەدى ول.
«Biz Birgemiz» قوعامدىق قورىنىڭ باسپا ءسوز قىزمەتى
پىكىر قالدىرۋ