شىمكەنت قالاسىندا ەكى بالانىڭ اناسىن سوققىعا جىققان كۇدىكتىلەردىڭ ءبىرى ۇستالدى. بۇل تۋرالى polisia.kz حابارلادى.
شىمكەنت قالاسى اباي اۋداندىق پوليسيا باسقارماسىنىڭ قىزمەتكەرلەرى جەدەل-ىزدەستىرۋ شارالارى بارىسىندا 48 جاستاعى كۇدىكتىنى قولعا تۇسىرگەن. ول قازىرگى ۋاقىتتا ۋاقىتشا ۇستاۋ يزولياتورىنا قامالدى.
"26 مامىر كۇنى 39 جاستاعى جەرگىلىكتى تۇرعىننىڭ دەنە جاراقاتىن الۋ فاكتىسى بويىنشا ق ر قىلمىستىق كودەكسى 107-بابىنىڭ 1-بولىگى بويىنشا سوتقا دەيىنگى تەرگەۋ جۇمىستارى جۇرگىزىلىپ جاتىر. وقيعا ورنىندا جەدەل تەرگەۋ توبى بارلىق قاجەتتى ءىس-شارالاردى وتكىزىپ، قىلمىسقا قاتىسى بار كۇدىكتىنى انىقتادى. ءبىرقاتار ءتيىستى ساراپتامالار تاعايىندالدى. تاعايىندالعان ساراپتامالاردىڭ قورىتىندىسى بويىنشا پروسەسسۋالدىق شەشىم قابىلدانادى. تەرگەۋ جۇمىستارى پروكۋراتۋرا مەن پوليسيا دەپارتامەنتى باسشىسىنىڭ باقىلاۋىندا بولادى"، دەلىنگەن حابارلامادا.
ايتا كەتەيىك، بۇعان دەيىن 39 جاستاعى ايەلدى بەلگىسىز بىرەۋلەر كوشەدە كەتىپ بارا جاتقان جەرىنەن زورلىق-زومبىلىق كورسەتىپ، ايەلىڭ ءتىسىن جانە ءۇش جەردەن جاعىن سىندىرعان.
