نازاربايەۆا سەناتقا قايتا كەلۋى ابدەن مۇمكىن

"التەرناتيۆا" زەرتتەۋ ورتالىعىنىڭ ديرەكتورى اندرەي چەبوتاريەۆتىڭ ايتۋىنشا، داريعا نازاربايەۆا ءوز كانديداتۋراسىن ۇسىنا الادى. ءبىراق ول ءۇشىن قولايلى ايماقتى تاڭداۋ قاجەت.

– ءيا، نازاربايەۆا وزىنە قولايلى ايماقتان كانديداتۋراسىن ۇسىنا الادى. ماسەلەن، الماتىدان، يا بولماسا، بالالىق شاعى وتكەن قاراعاندى وبلىسىنان شىقسا بولادى. ەلوردا دا قولايلى جەر. جالپى، نازاربايەۆا – ءوز كانديداتۋراسىن انىق ۇسىنا الاتىن ادام، – دەيدى چەبوتاريەۆ.

ساراپشى كانديداتقا ءماسليحات دەپۋتاتتارىنىڭ داۋىس بەرەتىنىن ەسكە سالدى. ال نازاربايەۆا سايلاۋعا قاتىسسا، اركىم ءارقالاي وي ءتۇيۋى مۇمكىن.

– بىرەۋلەر ونىڭ كانديداتۋراسىن "كىتاپحانا" (ەلباسى نۇرسۇلتان نازاربايەۆتىڭ رەزيدەنسياسى) ماقۇلداپ قويدى دەپ ويلاپ قالۋى مۇمكىن. ەندى بىرەۋلەر ونى سپيكەر قىزمەتىنەن الىپ تاستاعانىن ەسكە تۇسىرەدى. وسىنداي جاعدايدا شەشىم قابىلداۋ قاجەت، – دەپ اتاپ ءوتتى چەبوتاريەۆ. 

نازاربايەۆانىڭ بارلىق رەسۋرسى بار

ساياساتتانۋشى ايدوس سارىم دا داريعا نازاربايەۆا سايلاۋعا قاتىسا الادى دەپ سانايدى. ەكس-سپيكەر Nur Otan پارتياسىنىڭ اتىنان، يا بولماسا، جەكە ءوزى سايلاۋعا تۇسەدى.

– ءماسليحاتتا وتىرعان دەپۋتاتتاردىڭ باسىم بولىگى – Nur Otan  وكىلدەرى. سول سەبەپتى پارتيا وسى كانديداتتاردى قولدايىق دەسە، ولار پارتيالىق تارتىپكە باعىنادى. ءبىراق الداعى سايلاۋدىڭ ءجونى بولەك، وعان كەز كەلگەن ادام قاتىسا الادى. ول ءۇشىن پارتيانىڭ وكىلى بولۋ مىندەت ەمەس، – دەپ اتاپ ءوتتى سارىم.

ونىڭ ايتۋىنشا، كانديدات وزىنە سەنىمدى ءارى تانىمال بولسا، ءوز ايماعىندا قاجەتتى داۋىستىڭ كولەمىن جيناي الادى. ارينە، ول ءۇشىن قارجى جانە ۇيىمداستىرۋ رەسۋرستارى بولۋى قاجەت.

– داريعا نازاربايەۆا جەكە-دارا ءوز كانديداتۋراسىن ۇسىنا الادى. مەنىڭشە، ونىڭ مەديا، قارجى جانە تاعى باسقا رەسۋرستارى جەتكىلىكتى، – دەيدى سارىم.

سەناتقا قايتا بارۋى ەكىتالاي

ال ساياسي شولۋشى عازيز ابىشيەۆتىڭ ويىنشا، ەكس-سەناتور وتستاۆكادان كەيىن سەنات سايلاۋىنا تۇسپەيدى.

– ءيا، زاڭ بويىنشا داريعا نازاربايەۆا سەنات سايلاۋىنا تۇسە الادى. ءبىراق ول ءوز كانديداتۋراسىن ۇسىنادى دەپ ويلامايمىن. ول سەنات سپيكەرى بولدى. ودان كەيىن پرەزيدەنت جاڭا سپيكەردى ۇسىندى. سول كەزدە داريعا نازاربايەۆا ەشقانداي مالىمدەمە جاساعان جوق. ول سەناتقا ءوتۋدى جوسپارلاسا، پرەزديەنتتىك كۆوتامەن قالاتىن ەدى. ەگەر جەكە ءوزى ءوتۋدى ويلاسا، وندا ءوز وتستاۆكاسىنا قاتىستى پىكىر بىلدىرەتىن ەدى، – دەدى ابىشيەۆ.

ساراپشىنىڭ ايتۋىنشا، سايلاۋ كەزىندە جەڭۋ ءۇشىن قول جيناۋ كەرەك. ودان كەيىن كانديداتۋرانى ءماسليحات دەپۋتاتتارىنىڭ قاراۋىنا ۇسىنۋ كەرەك. داريعا نازاربايەۆانىڭ ونداي شارالارعا بارۋى ەكىتالاي.

سەنات دەپۋتاتتارىن قالاي سايلايدى؟

سەناتقا ءاربىر وبلىستان جانە رەسپۋبليكالىق ماڭىزى بار قالادان ەكى ادام سايلانادى. وسىلايشا، جوعارى پالاتاعا 34 دەپۋتات وتەدى. بۇدان بولەك، تاعى 15 سەناتوردى پرەزيدەنت تاعايىندايدى.

دەپۋتاتتىق وكىلەتتىلىكتىڭ مەرزىمى – 6 جىل. سەناتورلاردىڭ جارتىسى ءۇش جىل سايىن قايتا سايلانادى.

سەنات دەپۋتاتتارىن قۇپيا داۋىس بەرۋ ارقىلى تاڭدايدى. سايلاۋشىلار – ءماسليحات دەپۋتاتتارى.

دەرەككوز: Sputnik قازاقستان