15 ماۋسىمدا كەشكى ساعات 20:00-دەن باستاپ كوكشەتاۋ قالاسىنداعى 7 بلوكبەكەتتىڭ جۇمىسى قايتا جاندانىپ، قالادا كارانتيندىك شەكتەۋ شارالارى كۇشەيتىلەدى. 

"14 ماۋسىمداعى جاعداي بويىنشا وبلىستا كوروناۆيرۋس ينفەكسياسىن جۇقتىرعان 199 جاعداي تىركەلدى، ونىڭ 4ء-ى قايعىلى اياقتالدى. وبلىس ورتالىعىندا جاعداي كۇردەلەنە ءتۇستى. مونيتورينگ توبىنىڭ جۇمىسى تۇرعىنداردىڭ ءوزى مەن تۋىستارىنىڭ دەنساۋلىعىنا نەمقۇرايلى قارايتىنىن كورسەتتى. جاپپاي وتباسىلىق شارالار – تۋعان كۇن، ۇيلەنۋ تويى، كىسىنىڭ جىلىن بەرۋ، جەرلەۋ راسىمدەرى ءتارىزدى شارالاردىڭ وتكىزىلەتىنىن كورسەتتى. سانيتارلىق ەپيدەميولوگيالىق تالاپتاردى ورىندامايتىن كاسىپورىندار دا بار. بارلىق جاعداي بويىنشا اكىمشىلىك شارالار قولدانىلۋدا" دەلىنگەن حابارلامادا.

سوڭعى اپتادا قالادا ۆيرۋس جۇقتىرعاندار 42 ادامدى قۇرادى. ونىڭ ىشىندە اۋرۋ بەلگىسى بارلار – 15، اۋرۋ بەلگىسى بىلىنبەيتىندەر – 27.

ەسكە سالا كەتەيىك، سيمپتومى جوقتاردا اۋرۋدىڭ جوتەلۋ، دەنە قىزۋىنىڭ كوتەرىلۋى سىندى وزگە دە بەلگىلەرى بىلىنبەيدى. الايدا زەرتتەۋ قورىتىندىسى وڭ ناتيجە كورسەتىپ جاتىر.