ۇيىنە تۇسكەن ۇرىلار سوققىعا شىققان 79 جاستاعى ازامات ارىزدانبايتىنىن مالىمدەدى. ول دەنەسىنىڭ كوگەرۋىنە قۇلاپ قالۋى سەبەپ بولعانىن ايتادى. الايدا پوليسيا جابىرلەنۋشى "توناۋشىلار ءوزىنىڭ جاقىنى بولعاندىقتان، ولاردى قورعاپ وتىرعان بولۋى مۇمكىن" دەپ سانايدى.
اقپارات almaty_kris_p instagram پاراقشاسىنا جاريالانعان.
وقيعا الماتى وبلىسى جەتىگەن اۋىلىندا بولعان. بەلگىسىز ەر مەن ايەل زەينەتكەردىڭ ۇيىنە تەرەزە ارقىلى كىرگەن.
"اجە ۇيقىدان ويانىپ، حالاتىن كيىپ جاتقاندا باسىنان سوققى العان. توناۋشىلار ۇيدەن اقشا ۇرلاعان. ۇرىلار اۋىر سوققىدان ولگەن بولۋى كەرەك دەپ اجەنى نۇرا اۋىلىنا اپارىپ تاستاعان. سول ماڭنان ءوتىپ بارا جاتقان جەدەل جاردەم قىزمەتكەرلەرى سوققىعا جىعىلعان اجەنى كورىپ، اۋرۋحاناعا جەتكىزگەن. ءقازىر اجە ىلە اۋداندىق ورتالىق اۋرۋحاناسىنىڭ تراۆماتولوگيا بولىمشەسىندە جاتىر"، دەلىنگەن الەۋمەتتىك جەلىدەگى حابارلامادا.
الماتى وبلىسى پوليسيا دەپارتامەنتىندەگىلەر 14 ماۋسىمدا ىلە اۋداندىق ورتالىق اۋرۋحاناسىنا 79 جاستاعى زەينەتكەردىڭ تۇسكەنىن راستادى.
"اجەيدەن سۇراعاندا جالعىز ءوزى تۇراتىنىن جانە ۇيدە قۇلاپ، جاراقات العانىن ايتتى. ءبىراق تەرگەۋشىلەر بۇعان كۇماندانىپ وتىر. سوندىقتان ءىستىڭ انىق-قانىعى ءجىتى تەكسەرىلەدى. ايەل ءوزىنىڭ جاقىندارىن جاقتاپ وتىرعان بولۋى مۇمكىن" دەپ حابارلادى پوليسيا دەپارتامەنتىندەگىلەر.
ۆەدومستۆوداعىلاردىڭ دەرەگىنشە، زەينەتكەر ارىز جازۋدان جانە سوت-مەديسينا ساراپتاسىن جاساتۋدان باس تارتقان.
پىكىر قالدىرۋ