بۇگىن الماتى قالاسى مەدەۋ اۋدانىنىڭ №2 سوتىندا توتەنشە جاعداي كەزىندە "جالعان اقپارات تاراتتى" (ق ر قك 274-بابى 4-بولىگىنىڭ 2-تارماعى) دەپ ايىپتالعان بەلسەندى ءالنۇر يلياشيەۆتىڭ ءىسىن قاراۋ جالعاستى.

سوت پروسەسى تاعى دا "TrueConf" قوسىمشاسى ارقىلى ونلاين رەجيمدە ءوتتى. يلياشيەۆ جانە ونىڭ  ادۆوكاتتارى ۆيتاليي ۆورونوۆ، تاير نازحانوۆ جانە نۇرلان راحمانوۆ بايلانىس ساپاسىنىڭ ناشار ەكەنىن اتاپ ايتقان. نازحانوۆ بايلانىس ساپاسى جاقسارمايىنشا سوت پروسەسىن كەيىنگە قالدىرۋدى سۇرادى. يلياشيەۆتىڭ ءوزى سوت پروسەسى وفلاين رەجيمدە ءوتۋى ءۇشىن كارانتيننىڭ اياقتالۋىن كۇتۋگە دايىن ەكەنىن بىرنەشە رەت مالىمدەگەن.

ادۆوكات ۆورونوۆ ءوز سوزىندە ءىس ماتەريالدارىمەن ءالى تانىس ەمەستىگىن اتاپ ءوتتى. ول سونداي-اق سوت يلياشيەۆكە بىلىكتى قورعانىس قۇقىعىن قامتاماسىز ەتۋگە مىندەتتى ەكەنىن اتاپ ايتتى.

– قۇرمەتتى سوت، ءسىز مۇنى قالاي ىستەيسىز، مەن بىلمەيمىن، ءبىراق ءسىز ونى قامتاماسىز ەتۋىڭىز كەرەك. ايتپەسە، بۇل شىعارىلعان ۇكىمنىڭ زاڭدىلىعىنا كۇمان كەلتىرەدى جانە ءبىزدىڭ قورعاۋشى رەتىندەگى قۇقىقتارىمىزدى بۇزادى، – دەدى ۆورونوۆ سۋدياعا.

ادۆوكات نۇرلان راحمانوۆ ارىپتەسىن قولداپ، بىلاي دەدى:

"مەن سىزدەن سوت وتىرىسىن ونلاين رەجيمدە ەمەس، وففلاين رەجيمدە وتكىزۋدى جانە ءبىزدىڭ قورعالۋشىمەن تىكەلەي قارىم-قاتىناس جاساۋعا مۇمكىندىك بەرۋدى سۇرايمىن".

وسى ەسكەرتۋلەرگە قاراماستان، سۋديا سوت تەرگەۋىنە كوشتى. ادۆوكات ۆورونوۆ بۇعان اشۋلانىپ، سۋديانى قىزمەتىنەن بوساتۋ تۋرالى اۋىزشا ءوتىنىش ءبىلدىردى.

– ادۆوكاتتىڭ ءىس ماتەريالدارىمەن تانىسپاۋى جاعدايىندا سوت تەرگەۋىنە كوشۋ مەنىڭ قورعاۋشىمنىڭ قورعالۋ قۇقىعىن ورەسكەل بۇزۋ بولىپ تابىلادى. مەن سوتقا سەنىمسىزدىك بىلدىرەتىن سەبەپتەر بار دەپ سانايمىن. سوت ءادىل وتكەنىنە كۇمانىم بار، مەنىڭ ويىمشا، سوت كونستيتۋسيالىق نورمالاردى جانە قىجك-نى (قىلمىستىق ءىس جۇرگىزۋ كودەكسى) بۇزۋ ارقىلى ءبىزدىڭ قورعالۋشىمىزدى ايىپتاۋعا تىكەلەي نەمەسە جاناما مۇددەلى. سوندىقتان مەن سىزگە سەنىمسىزدىك جانە قارسىلىق بىلدىرەمىن، – دەدى ۆورونوۆ.

سۋديا ماحارادزە سوت وتىرىسىن كەيىنگە شەگەرۋدى قاجەت دەپ سانادى.

يلياشيەۆتى جاقتاۋشىلار توبى الماتى قالالىق سوتىنىڭ عيماراتىنا «ءالنۇر يلياشيەۆكە بوستاندىق» دەگەن جازۋمەن شىقتى. بەلسەندىلەر ازاماتتاردىڭ قۇقىعىن بۇزاتىن ونلاين-سوتتارعا قارسى ەكەنىن  ايتتى.

ەسكە سالا كەتەيىك، 18 ساۋىردە الماتى قالالىق تەرگەۋ سوتى بەلسەندى ءالنۇر يلياشيەۆتى ەكى ايعا قاماۋ تۋرالى قاۋلى شىعارعان.