ءماجىلىس ءتوراعاسى نۇرلان نىعماتۋلين ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەياسى كەڭەسىنىڭ وتىرىسىنا ۆيدەوكونفەرەنسيا رەجيمىندە قاتىستى.
كەڭەستىڭ كەزەكتى كوشپەلى وتىرىسى دۋشانبەدە ءوتۋى كەرەك بولاتىن. الايدا، كوروناۆيرۋس ىندەتىنە بايلانىستى كۇن تارتىبىندەگى ماسەلەلەر بەينەكونفەرەنسيا رەجيمىندە تالقىلاندى.
وتىرىسقا ارمەنيا، بەلارۋس، قازاقستان، قىرعىزستان، رەسەي جانە تاجىكستاننىڭ پارلامەنت سپيكەرلەرى، سونداي-اق، سەربيا مەن اۋعانستان پارلامەنتىنەن ۇقشۇ پا باقىلاۋشىلارى قاتىستى.
قاتىسۋشىلار پارلامەنتتىك اسسامبلەيانىڭ 2021-2025 جىلدارعا ارنالعان ءىس-شارالار باعدارلاماسىنىڭ جوباسىن قارادى.
وتىرىستا ءسوز سويلەگەن ءماجىلىس ءتوراعاسى نۇرلان نىعماتۋلين قۇجات نورماتيۆتىك-قۇقىقتىق بازانى كەڭەيتۋگە جانە عىلىمي-ادىستەمەلىك قامتاماسىز ەتۋدى جەتىلدىرۋگە باعىتتالعان كوپتەگەن تاقىرىپتار مەن باعىتتاردى قامتيتىنىن اتاپ ءوتتى.
باعدارلاما جوباسى ۇقشۇ پا تۇراقتى كوميتەتتەرىندە جانە ۇلتتىق پارلامەنتتەردە قارالادى.
– مودەلدىك زاڭنامانى ازىرلەۋ كەزىندە ۇجىمدىق قاۋىپسىزدىك تۋرالى شارت ۇيىمىنىڭ ۇستانىمدارى مەن ماقساتتارىن جانە ۇقشۇ جارعىسىن باسشىلىققا الىپ، سونداي-اق، ۇيىمعا مۇشە مەملەكەتتەردىڭ ۇلتتىق زاڭنامالارىن ەسكەرۋ قاجەت، – دەدى نۇرلان نىعماتۋلين.
سونىمەن قاتار، جيىنعا قاتىسۋشىلارعا ۇقشۇ ۇجىمدىق قاۋىپسىزدىك كەڭەسىنىڭ كۇزگى سەسسياسىنىڭ قورىتىندىلارى، ۇيىمنىڭ جاۋاپكەرشىلىك اياسىنداعى احۋالى، ۇجىمدىق قاۋىپسىزدىككە تونەتىن قاتەرلەر مەن قاۋىپتەرگە قارسى ءىس-شارالار جانە ۇقشۇ اياسىندا جاسالعان حالىقارالىق شارتتاردى راتيفيكاسيالاۋ تۋرالى اقپارات بەرىلدى.
ءماجىلىستىڭ باسپا ءسوز قىزمەتى
پىكىر قالدىرۋ