ق ر ءبىلىم جانە عىلىم ءمينيسترى اسحات ايماعامبەتوۆ ۆەدومستۆونىڭ اپپارات جينالىسىندا مۇعالىمدەرگە جالاقى مەن دەمالىس اقىسىنىڭ ۋاقىتىلى تولەنۋىن تەكسەرىپ، قىسقا مەرزىم ىشىندە ءتيىستى شارالار قولدانۋدى تاپسىردى. بۇل تۋرالى مينيسترلىكتىڭ باسپا ءسوز قىزمەتى حابارلادى.

ەڭبەك دەمالىسىنا شىققان پەداگوگتەردىڭ 93%-ى دەمالىس اقىسىن ۋاقىتىلى الدى. قالعان 7%-ىنا ۋاقىتىلى تولەمەگەنى انىقتالدى.

جۇمىس بەرۋشىلەر مۇعالىمدەرگە ەڭبەك دەمالىسىنىڭ تولەمىن كەشىكتىرگەنى نەمەسە تولەمەگەنى ءۇشىن زاڭعا سايكەس جازالانادى دەپ اتاپ ءوتتى.

– مينيسترلىك مۇعالىمدەردىڭ شاعىمدارىن قاراستىرىپ، دەمالىس اقىسىن تولەۋ بويىنشا جاعدايدى باقىلاۋدا ۇستاپ وتىر. بيۋدجەتتە جالاقىعا دا، ەڭبەك دەمالىسى اقىسىنا دا قاراجات قاراستىرىلعان. ياعني اقشا بار، ءبىراق كەيبىر ايماقتاردا تولەمنىڭ ۋاقتىلى جاسالماعانى انىقتالدى، – دەدى بعم باسپا ءسوز حاتشىسى گاۋحار وماربەك.

بعم ءمينيسترى اسحات ايماعامبەتوۆ ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنە ەڭبەكاقىنى ۋاقىتىلى تولەمەۋ، ونىڭ ىشىندە مۇعالىمدەرگە تولەنەتىن دەمالىس اقىسى تۋرالى فاكتىلەردى ءتيىستى شارا قولدانۋ ءۇشىن وبلىستىق مەملەكەتتىك ەڭبەك ينسپەكسيالارىنا جىبەرۋدى تاپسىردى.

زاڭعا سايكەس مەكتەپتەر مەن بالاباقشالارداعى پەداگوگتەرگە جالاقى تولەۋ تىكەلەي اۋداننىڭ نەمەسە قالانىڭ بيۋدجەتىنەن جۇزەگە اسىرىلادى.