شىعىس قازاقستان وبلىسىنىڭ اياگوز اۋدانىندا جويقىن داۋىل كەزىندە 7 ادام زارداپ شەكتى. بۇل تۋرالى وبلىس اكىمى دانيال احمەتوۆ  Instagram پاراقشاسىندا جازدى. 
⠀
– كەشە كەشكە اياگوز اۋدانىندا جىلدامدىعى سەكۋندىنا 28 مەترگە جەتكەن ەكپىندى جەل سوعىپ ءوتتى. بۇگىن اۋداندا توتەنشە جاعداي جاريالاندى. ورىنباسارىم ب.باياحمەتوۆ باستاعان ارنايى كوميسسيا جولعا شىقتى. وقيعا ورنىندا بارلىق كوممۋنالدىق جانە اپاتتىق قىزمەتتەر جۇمىس جۇرگىزۋدە. قالپىنا كەلتىرۋ جۇمىستارىن ءبىر اپتا ىشىندە اياقتاۋدى تاپسىرامىن. قاجەتتى قاراجات بولىنەدى، – دەدى د. احمەتوۆ.
⠀
ونىڭ ايتۋىنشا توتەنشە جاعداي سالدارىنان 72 تۇرعىن جانە 19 كوپقاباتتى ۇيلەر، سونداي-اق 8 اكىمشىلىك عيمارات زارداپ شەككەن.
⠀
– اعاشتار مەن بۇتاقتاردىڭ قۇلاۋى سالدارىنان ەلەكتر جەلىلەرى ءۇزىلدى. ناتيجەسىندە 3679 ابونەنت ەلەكتر جارىعىنسىز قالعان ەدى. قازىرگى ۋاقىتتا كەزەڭ-كەزەڭىمەن جارىقتى قوسىپ جاتىر. شق وەك-نىڭ 5 اپاتتىق بريگاداسى جاقىن ارادا قالعان 700 ابونەنتتە جۇمىستى اياقتاۋى ءتيىس. قالالىق اۋرۋحاناعا ءتۇرلى دارەجەدەگى جاراقاتتارمەن 7 ادام جۇگىنگەن. ءقازىر جاعدايلارى تۇراقتى، ستاسيوناردا ءبىر ناۋقاس جاتىر، – دەپ جازدى وبلىس باسشىسى.