تۇركىستان وبلىسىندا جاسوسپىرىمدەرگە ارنالعان سۋيسيدتىك توپتىڭ "كۋراتورى" ۇستالدى. ول ينتەرنەت ارقىلى جاستاردى سۋيسيد جاساۋعا يتەرمەلەگەن. بۇل تۋرالى ءىىم-نىڭ باسپا ءسوز قىزمەتى حابارلادى.
كامەلەتكە تولماعاندارعا قاتىستى قۇقىققا قارسى ارەكەتتەردى انىقتاۋ بويىنشا ينتەرنەت جەلىسىنە مونيتورينگ جۇرگىزۋ كەزىندە ءىىم كريمينالدىق پوليسيا جانە تەرگەۋ قىزمەتكەرلەرى كامەلەتكە تولماعان قازاقستاندىقتاردىڭ قاتىسۋىمەن وز-وزىنە قول جۇمساۋ سيپاتىنداعى توپ تۋرالى اقپارات انىقتالعان.
وز-وزىنە قول جۇمساۋدى ناسيحاتتاۋ بويىنشا وعان قاتىسى بار ادامداردى انىقتاۋ جانە ۇستاۋ ءۇشىن ق ر ءىىم كيبەرقىلمىسقا قارسى ءىس-قيمىل ورتالىعىنىڭ جانە تۇركىستان وبلىسى پوليسيا دەپارتامەنتىنىڭ قىزمەتكەرلەرىنەن ارنايى جەدەل-تەرگەۋ توبى قۇرىلعان.
"پوليسيا قىزمەتكەرلەرى ءارى قاراي تەكسەرۋ جۇمىسىن جۇرگىزۋ بارىسىندا ينتەرنەت جەلىسىندەگى ۇيىمداستىرۋشىنىڭ جەكە-باس دەرەكتەرى مەن مەكەنجايىن انىقتاپ ۇستادى. ول ارىس قالاسىنىڭ تۇرعىنى بولىپ شىقتى.
ءتىنتۋ كەزىندە كۇدىكتىدەن نوۋتبۋك، ۇيالى تەلەفون، 3 قوراپ سيم-كارتاسىمەن جانە باسقا دا زاتتاي دالەلدەمەلەر الىندى. تەلەفوننان سۋيسيدكە باعىتتالعان تەلەگرام ارنالارى تابىلدى" دەلىنگەن اقپاراتتىق حابارلامادا.
قازىرگى ۋاقىتتا اتالعان جايت ادام ولتىرۋگە وقتالۋ بويىنشا تىركەلىپ، سوتقا دەيىنگى تەرگەۋ امالدارى جۇرگىزىلۋدە. سوت سانكسياسىمەن كۇدىكتى قاماۋعا الىنعان.
– پوليسيا قىزمەتكەرلەرى ءىستىڭ تولىق ءمان-جايىن تەكسەرۋدە. سونداي-اق جاسوسپىرىمدەردى وسىنداي ولىمگە اكەلەتىن ويىندارعا قاتىستىرۋى مۇمكىن ادامداردى جانە ارنا قاتىسۋشىلارىنىڭ وزدەرىن دە انىقتاۋ ۇستىندە، – دەپ اتاپ ءوتتى ءىىم كريمينالدىق پوليسيا دەپارتامەنتىنىڭ باستىعى دۋمان تايەۆ.
ءىىم اتا-انالاردى بالالاردىڭ ۆيرتۋالدى ومىرىنە باقىلاۋدى كۇشەيتۋگە شاقىرادى. جانە شۇعىل قاجەتتى شارالار قابىلداناتىن وسىعان ۇقساس جايتتار ورىن السا، تەز ارادا پوليسياعا حابارلاۋدى سۇرايدى.
پىكىر قالدىرۋ