حالىقارالىق Amnesty International (AI) ادام قۇقىعىن قورعاۋ ۇيىمى ازاماتتىق بەلسەندى ءاسيا تولەسوۆانىڭ نەگىزسىز قاماۋدا وتىرعانىن ايتىپ، بيلىكتى ونى بوساتۋعا شاقىردى، دەپ جازادى ازاتتىق.
بيلىك ءاسيا تولەسوۆانى 6 ماۋسىم كۇنگى نارازىلىق كەزىندە پوليسەيدىڭ "ار-نامىسىنا ءتيدى" جانە "كۇش قولداندى" دەپ ايىپتاعان. 10 ماۋسىمدا الماتى قالاسىنىڭ تەرگەۋ سوتى تولەسوۆانى 10 كۇنگە قامادى. ول ءۇش جىلعا دەيىن باس بوستاندىعىنان ايرىلۋى مۇمكىن.
16 ماۋسىمدا جاريالانعان مالىمدەمەدە قۇقىق قورعاۋ توبى تولەسوۆانى قاماۋ قازاقستاننىڭ ادام قۇقىعى سالاسىندا العان مىندەتتەمەلەرى مەن زاڭناماسىنا قايشى كەلەدى دەپ جازدى.
"ءاسيا تولەسوۆانى قاماۋدا ۇستاۋ بۇل اسىرا سىلتەگەندىك، ونى ساياسي بەلسەندىلىگى ءۇشىن جازالاپ وتىرعانعا ۇقسايدى" دەلىنگەن مالىمدەمەدە.
6 ماۋسىمدا پوليسيا نارازىلاردى ۇستاپ جاتقان كەزدە تولەسوۆا جانىنداعى پوليسەيلەردىڭ ءبىرىنىڭ فۋراجكاسىن قاعىپ تۇسىرگەننەن كەيىن "بيلىك وكىلىنە كۇش جۇمساۋ" بابى بويىنشا كۇدىككە ءىلىندى. كۋاگەرلەردىڭ ايتۋىنشا، ازاماتتىق بەلسەندى وعان دەيىن پوليسيا ۇستاعان ازاماتتارعا اراشا تۇسپەك بولعان.
تولەسوۆانىڭ ءوزى جەلىدە "پوليسيانىڭ قوعامعا ەش ءقاۋىپ توندىرمەي ءوز ويىن بەيبىت جولمەن ايتۋعا كەلگەن قارۋسىز جۇرتقا جاساعانىن كورگەندە ەموسيامدى جاسىرا المادىم" دەپ جازدى.
9 ماۋسىمدا قۇقىق قورعاۋشىلار، ازاماتتىق قوعام وكىلدەرى پرەزيدەنت قاسىم-جومارت توقايەۆقا حات جازىپ، تولەسوۆانى بوساتۋعا شاقىردى. ولار سونىمەن بىرگە سوڭعى بىرنەشە جىل ىشىندە بەيبىت جيىن كەزىندەگى پوليسيانىڭ ارەكەتىن تاۋەلسىز زەرتتەۋدى سۇرادى.
وتكەن اپتادا Human Rights Watch ۇيىمى دا تولەسوۆانى بوساتۋدى، ونىڭ ۇستىنەن قوزعالعان قىلمىستىق ءىستى توقتاتۋعا شاقىرعان.
AI ۇيىمىنىڭ پىكىرىنشە، 10 ماۋسىم كۇنگى كۇدىكتى، ادۆوكات، سۋديا جانە پروكۋرور عانا قاتىسقان ونلاين سوت وتىرىسىن اشىق ءوتتى دەۋگە كەلمەيدى.
"ۇكىمەت كوروناۆيرۋستىڭ تاراۋىن شەكتەۋ ماقساتىندا سوت پروسەدۋرالارىنا وزگەرىس ەنگىزۋگە ءماجبۇر بولسا دا، بۇل وزگەرىستەر ادامداردىڭ اشىق ءارى ءادىل سوتقا تارتىلۋ قۇقىعىن تاپتاماۋى ءتيىس" دەلىنگەن مالىمدەمەدە.
پىكىر قالدىرۋ