الماتىدا قالا تۇرعىندارىن مەگاپوليستىڭ ءار اۋماعىنداعى اۋا ساپاسى تۋرالى حاباردار ەتەتىن جوبا ىسكە قوسىلدى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

الماتى اكىمى باقىتجان ساعىنتايەۆ ءوزىنىڭ Twitter-دەگى پاراقشاسىندا قالالىقتاردىڭ قورشاعان ورتانىڭ جاعدايى، سونىڭ ىشىندە اۋاعا قاتىستى حاباردار بولۋ دەڭگەيىن ارتتىرۋ ءۇشىن ەكولوگيالىق جوبانىڭ ىسكە قوسىلعانى تۋرالى جازدى.

– اتموسفەرالىق اۋانىڭ ساپاسىن LED ەكراندا كورسەتەمىز. قالانىڭ ءار بولىگىندە ورنالاسقان داچيكتەردەگى اقپاراتتى قازگيدرومەت جاڭارتىپ، وڭدەيدى. بۇل جوبا الماتىلىقتاردىڭ قالانىڭ ەكولوگيالىق احۋالىن ءبىلىپ وتىرۋىنا مۇمكىندىك بەرەدى، – دەپ حابارلادى ب. ساعىنتايەۆ.

اقپارات 26 داچيكتەر ارقىلى جاقىن ماڭداعى LED-ەكرانعا تۇسەدى. مۇنداعى مالىمەتتەر ءبىر كۇندە ءۇش رەت جاڭارادى. قوسىمشا تاعى 10 مونيتورينگتىك ستانسيا قوسىلاتىن بولادى.

مالىمەتتەر اۋانىڭ نەگىزگى التى كورسەتكىشىنەن تۇرادى. ولار: رم 2،5 ولشەنگەن بولىكتەرى، كۇكىرتتىڭ ديكوسيدى، ازوتتىڭ ديكوسيدى، ازوتتىڭ وكسيدى، كومىرتەگىنىڭ وكسيدى، فەنول.

بۇل جوبا الماتى اكىمى ب. ساعىنتايەۆتىڭ تاپسىرماسىنا سايكەس جۇزەگە اسىپ وتىر جانە قالانىڭ ەكولوگيالىق احۋالىن جاقسارتۋدىڭ كەشەندى شارالارىنىڭ ءبىرى.

ەسكە سالساق، ەكولوگيالىق اقپاراتقا قولجەتىمدىلىك قۇقىعى قازاقستان رەسپۋبليكاسىنىڭ ەكولوگيالىق كودەكسىندە ايتىلعان.