الماتى اكىمى باقىتجان ساعىنتايەۆ مەديسينا قىزمەتكەرى كۇنىمەن قۇتتىقتاۋ ءۇشىن قالانىڭ مەديسينا قاۋىمداستىعىمەن ونلاين-كەزدەسۋ وتكىزدى.

قالا اكىمى دارىگەرلەرگە جانە مەگاپوليستىڭ بارلىق مەديسينا قىزمەتكەرلەرىنە العىس سوزدەرىن جەتكىزدى.

– گيپپوكرات انتىنا ادال اق حالاتتى ابزال جاندار، سىزدەر ۋاقىت سىنىنا توتەپ بەرە بىلدىڭىزدەر. كوروناۆيرۋسپەن كۇرەستە سىزدەردىڭ جانقيارلىق ەڭبەكتەرىڭىز ءۇشىن بارشا الماتىلىقتاردىڭ اتىنان العىسىمدى بىلدىرەمىن. ادام ساۋلىعىنىڭ قورعانى بولىپ جۇرگەن بۇل ماماندىق يەلەرىنىڭ بەدەلىنە باعا جەتپەيدى، – دەپ اتاپ ءوتتى باقىتجان ساعىنتايەۆ.

قالا اكىمى الماتىنىڭ ۇنەمى دامىعان مەديسينا ورتالىعى بولعاندىعىن باسا كورسەتتى. مۇندا عىلىمي-زەرتتەۋ ينستيتۋتتارى جانە ورتالىقتار، مەديسينالىق ءبىلىم بەرەتىن ۇيىمدار، قالالىق، رەسپۋبليكالىق، ۆەدومستۆالىق، جەكە كلينيكالار شوعىرلانعان، قالادا 30 مىڭنان استام مەديسينا قىزمەتكەرلەرى ەڭبەك ەتەدى.

جىل سايىن كاسىبي مەرەكە قارساڭىندا كاسىبي بايقاۋلار وتكىزىلەدى. بيىل ماماندىقتىڭ ۇزدىگىن انىقتايتىن بۇل بايقاۋ 13 نوميناسيا بويىنشا ءوتتى. اتاپ ايتقاندا، ۇزدىك دارىگەر جانە مەدبيكە، ۇزدىك ينفەكسيونيست، ەمحانا مەن جەدەل جاردەمنىڭ ۇزدىك دارىگەرى، سونداي-اق ۇزدىك جۇرگىزۋشى.

– بۇل بايقاۋ سىزدەردىڭ ءارقايسىڭىزدىڭ ەڭبەكتەرىڭىزدىڭ بارىنشا ماڭىزدى ەكەنىن كورسەتەدى. بارلىق جەڭىمپازداردى قۇتتىقتايمىن، – دەپ اتاپ وتكەن ب. ساعىنتايەۆ كوروناۆيرۋسپەن كۇرەستە جانكەشتىلىك تانىتىپ جۇرگەن ەكى مىڭنان استام دارىگەردىڭ ەرەن ەڭبەكتەرىن ەرەكشە باعالادى.

قالاعا سىڭىرگەن زور ەڭبەكتەرى ءۇشىن بەس مەديسينا قىزمەتكەرى «ەڭبەگى ءۇشىن» توسبەلگىسىمەن ماراپاتتالدى. ءبىرقاتار مەديسينا قىزمەتكەرلەرى قالا اكىمىنىڭ العىس حاتتارىن يەلەندى.

– پاندەميا ءبىزدى كوپ نارسەگە ۇيرەتتى. ورتاق كۇش-جىگەرىمىزبەن ءبىز بۇل قيىندىقتى دا ابىرويمەن ەڭسەرەمىز، الماتىلىقتاردىڭ دەنساۋلىعىن ساقتاۋ مەن نىعايتۋ جولىندا ءبارىمىز بىرىگىپ، ايانباي ەڭبەك ەتەمىز، مەن بۇعان سەنىمدىمىن، – دەپ اتاپ ءوتتى الماتى اكىمى ب. ساعىنتايەۆ.

قالا اكىمىنىڭ وسى قىزمەتكە تاعايىندالعان كۇننەن باستاپ دەنساۋلىق ساقتاۋ سالاسىن دامىتۋعا ەرەكشە نازار اۋدارىپ كەلە جاتقانى بۇرىننان بەلگىلى. ونىڭ تىكەلەي تاپسىرماسى بويىنشا قالانىڭ بارلىق مەديسينا مەكەمەلەرىنە ماتەريالدىق-تەحنيكالىق جاعىنان جابدىقتالۋىنا قاتىستى اۋديت جۇرگىزىلدى. جەرگىلىكتى جانە رەسپۋبليكالىق بيۋدجەت ارقىلى قارجىلاندىرۋ بويىنشا مەديسينا مەكەمەلەرىن جابدىقتاۋدىڭ ءۇش جىلدىق جوسپارى جاسالدى. وسىنىڭ ارقاسىندا الماتىنىڭ مەديسينا مەكەمەلەرىنىڭ جابدىقتالۋ دەڭگەيىن 90%-عا جەتكىزۋ جوسپارلانعان.

ايتا كەتەرلىگى، قالاعا قوسىلعان اۋدانداردا «قادامدىق قولجەتىمدىلىك» قاعيداسى بويىنشا العاشقى مەديسينالىق كومەك كورسەتەتىن مەكەمەلەر ىسكە قوسىلدى. مىسالى، العاشقى مەديسينالىق كومەك كورسەتۋ ۇيىمدارىندا جالپى پراكتيكا دارىگەرلەرىنىڭ 171 قوسىمشا ۋچاسكەسى اشىلدى. جالپى قالا بويىنشا جالپى پراكتيكانىڭ 931 ۋچاسكەسى ۇيىمداستىرىلدى.

بۇلاردان وزگە، 2019 جىلدىڭ 10 ماۋسىمىنان باستاپ 10 دارىگەرلىك امبۋلاتوريا اشىلدى، جوعارى مەديسينالىق كوللەدج بەن №30 قالالىق ەمحانا كۇردەلى جوندەۋدەن ءوتتى.

2020 جىلدىڭ 1 قاڭتارىنان باستاپ ءمامس جۇيەسىندە مەديسينالىق ساۋىقتىرۋ كولەمى 7،4 ەسە ءوستى. الماتى قالاسى بويىنشا ستاسيونارلىق جانە ستاسيوناردى الماستىرۋ نىساندارىن قارجىلاندىرۋ 4 ەسەگە، ال كلينيكالىق-دياگنوستيكالىق قىزمەتتى قارجىلاندىرۋ دا 4 ەسەگە ارتتى.

2019 جىلدىڭ ماۋسىمى 2020 جىلدىڭ مامىر ايى ارالىعىندا دەنساۋلىق ساقتاۋدىڭ 5 نىسانى ىسكە قوسىلدى، ونىڭ ىشىندە جەدەل جاردەمنىڭ 2 قوسالقى ستانسياسى جانە پسيحيكالىق ساۋىقتىرۋ ورتالىعىنىڭ قالالىق كورپۋسى بار.