الماتىدا كوروناۆيرۋس ينفەكسياسىنىڭ تارالۋىمەن كۇرەس اياسىندا سانيتارلىق-ەپيدەميولوگيالىق قاۋىپسىزدىك شارالارىنىڭ ساقتالۋىن باقىلاۋ بويىنشا مونيتورينگتىك توپتار جۇمىستارىن جالعاستىرۋدا. 15 –18 ماۋسىم ارالىعىنداعى مونيتورينگتىك توپتار ءشوب-تىڭ 276 نىسانىن تەكسەردى. 

باس مەملەكەتتىك سانيتارلىق دارىگەردىڭ قاۋلىسىنا قايشى كەلەتىن ءتارتىپ بۇزۋشىلىقتار قالانىڭ ءارتۇرلى اۋداندارىندا ورنالاسقان ءبىرقاتار اسحانا، مەيرامحانا، ازىق-تۇلىك دۇكەندەرى، ءدامحانا مەن كوفەحانالاردان انىقتالعان.

سونىمەن بىرگە ءتارتىپبۇزۋشىلار اراسىندا اۆتوشينالار جانە ديسكتەر دۇكەنى،  ازىق-تۇلىكتىك ەمەس دۇكەندەر، سۇلۋلىق سالوندارى، شاشتارازدار، قوناقۇيلەر جانە سامسا، دونەر، فريزەرلى بالمۇزداق ساتاتىن دۇڭگىرشەكتەر، ءدارىحانالار، اياق كيىم جوندەۋ ورنى، وقۋ ورتالىعى، ستوماتولوگيالىق ورتالىقتار، لومباردتار، نوتاريۋس قىزمەتتەرى، ابونەتتىك ەسەپتەۋ ورتالىعى دا بار.

ەپيدەميولوگتار سانيتارلىق تالاپتاردى ساقتاۋدىڭ ماڭىزدىلىعىن ەسكەرتتى. اتالعان نىسانداردا مىناداي ءتارتىپ بۇزۋشىلىقتار انىقتالعان:

- الەۋمەتتىك قاشىقتىق بەلگىلەرىنىڭ بولماۋى؛
- بايلانىسسىز تەرمومەتريانىڭ ساقتالماۋى؛
- جەكە قورعانۋ قۇرالدارىن تيىسىنشە پايدالانباۋ جانە كادەگە جاراتپاۋ
- ەسەپكە الۋ جۋرنالىنىڭ بولماۋى؛
- سانيتايزەرلەردىڭ بولماۋى؛
- پاۆيلونداردىڭ كىرەبەرىستەرىندە دەزينفەكسيالاۋ كىلەمشەلەرىنىڭ بولماۋى؛
- پايدالانىلعان ماسكالار مەن قولعاپتار ءۇشىن قوقىس جاشىكتەرىنىڭ بولماۋى؛
- ازىق-تۇلىك دۇكەندەرىننىڭ ونىمدەرىندە قورعاۋ پلەنكالارىنىڭ بولماۋى.

سونىمەن بىرگە جۇرگىزىلگەن تەكسەرۋلەر ناتيجەلەرى بويىنشا انىقتالعان ءتارتىپ بۇزۋشىلىقتار جويىلعانعا دەيىن 22 نىساننىڭ قىزمەتى توقتاتىلدى. 

الماتى قالاسى بويىنشا بارلىعى 3442 نىسان تەكسەرىلدى. ولاردىڭ ىشىندە 402 نىساننان الماتى قالاسىنىڭ باس مەملەكەتتىك سانيتار دارىگەرىنىڭ قاۋلىسىنداعى تالاپتاردىڭ بۇزىلعانى انىقتالدى. وسىعان بايلانىستى، ەسكەرتۋلەردى تۇزەتكەنگە دەيىن 303 نىساننىڭ قىزمەتى توقتاتىلدى (ولاردىڭ ىشىندە 284 نىسان باسشىلىقتىڭ شەشىمىمەن، 19 نىسان قاۋلىلار بويىنشا).

سونىمەن بىرگە، قوعامدىق كولىكتە سانيتارلىق تالاپتاردىڭ ساقتالۋىنا ەرەكشە كوڭىل بولىنۋدە. وسى ماقساتتا 16 ماۋسىمدا #102، 48، 19، 115 باعىتتارداعى قوعامدىق كولىكتەرگە تەكسەرۋ جۇرگىزىلدى. ونىڭ بارىسىندا جولاۋشىلاردىڭ، سونىمەن بىرگە جۇرگىزۋشىنىڭ دە جەكە قورعانىس قۇرالدارىن پايدالانۋ جانە جويۋدىڭ ەرەجەلەرىن دۇرىس ساقتاماۋ بۇزۋشىلىقتار انىقتالدى. اتالعان اۆتوپاركتەردىڭ باسشىلارىنا ۇسىنىس حاتتار دايىندالادى. ەپيدەميولوگتار اۆتوبۋس جولاۋشىلارىنا كۆي الدىن الۋ بويىنشا ءتۇسندىرۋ جۇمىستارىن جۇرگىزدى. 

ەسكە سالا كەتەيىك، الماتى قالاسىنىڭ اكىمى باقىتجان ساعىنتايەۆتىڭ باستاماسىمەن مونيتورينگتىك توپتاردىڭ جۇمىسى جالعاسۋدا، ولاردىڭ قۇرامىنا تاۋارلار مەن قىزمەتتەردىڭ ساپاسى مەن قاۋىپسىزدىگى اۋداندىق دەپارتامەنتتەرىنىڭ، كاسىپكەرلىك بولىمدەرىنىڭ، "اتامەكەن" ايماقتىق پالاتاسىنىڭ وكىلدەرى، پوليسيا قىزمەتكەرلەرى جانە ب ا ق وكىلدەرى كىرەدى.