الماتى اكىمى باقىتجان ساعىنتايەۆ قالالىقتاردىڭ باستى تالابى – قوعامدىق قاۋىپسىزدىكتى قامتاماسىز ەتۋ ەكەنىن اتاپ ءوتتى. بۇل تۋرالى ءوزىنىڭ Twitter-دەگى پاراقشاسىندا قۇتتىقتادى.

– پوليسيا قىزمەتكەرلەرىن كاسىبي مەرەكەسىمەن قۇتتىقتايمىن! قوعامدىق قاۋىپسىزدىكتى قامتاماسىز ەتىپ، حالىقتىڭ اماندىعىن ساقتاپ جۇرگەندەردىڭ الدىڭعى قاتارى – سىزدەرسىزدەر. سىزدەرگە مىقتى دەنساۋلىق، وتباسىلارىڭىزعا اماندىق تىلەيمىن!، – دەپ جازدى ب. ساعىنتايەۆ.

الماتى اكىمدىگىنىڭ جۇمىسىنداعى باستى مىندەتتەردىڭ ءبىرى قوعامدىق قاۋىپسىزدىكتى قامتاماسىز ەتۋ ەكەنى بۇرىننان بەلگىلى. وسىناۋ ابىرويلى ءىستى جۇزەگە اسىرۋ ءۇشىن وتكەن جىلدان باستاپ كوشەلەر مەن اۋلالاردى پاترۋلدەۋ كۇشەيتىلدى، قالانىڭ بارلىق اۋداندارىندا پوليسيانىڭ ءموبيلدى پۋنكتتەرى اشىلدى.

ناتيجەسىندە قىلمىس دەڭگەيى كۇرت قىسقاردى. بۇگىنگى كۇنى ەكى مىڭنان استام پوليسيا قىزمەتكەرى تاۋلىك سايىن قوعامدىق ءتارتىپتى ساقتاۋ جولىندا ايانباي قىزمەت ەتۋدە.

توتەنشە جاعداي كەزىندە پوليسيا قىزمەتكەرلەرى مەديكتەرمەن، سانيتارلىق دارىگەرلەرمەن، اسكەريلەرمەن بىرگە بلوك بەكتتەردە تاۋلىك بويىنا ءوز مىندەتتەرىن مۇلتىكسىز ورىنداپ، قالادا قۇقىقتىق ءتارتىپتى قامتاماسىز ەتتى. بۇل شارالارعا بەس مىڭنان استام پوليسيا قىزمەتكەرلەرى تارتىلدى.