قازاقستاندىق بيزنەسمەندەرگە مەملەكەتتىك باعدارلامالاردىڭ جەڭىلدەتىلگەن شارتتارى بويىنشا نەسيەنى كەيىنگە قالدىرۋ نەمەسە قارىزدى قايتا قارجىلاندىرۋ مۇمكىندىگى بەرىلدى. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى مادينا ءابىلقاسىموۆا ايتتى، – دەپ حابارلايدى Tengrinews.kz ءتىلشىسى.

ۇكىمەت وتىرىسىندا ءابىلقاسىموۆا 16 ناۋرىزدان 15 ماۋسىمعا دەيىن جەكە تۇلعالار مەن شاعىن جانە ورتا بيزنەس (شوب) سۋبەكتىلەرى ءۇشىن نەسيەلەر بويىنشا تولەمدەردىڭ مەرزىمى ۇزارتىلعانىن حابارلادى. وسى كەزەڭدە بۇل مۇمكىندىكتى 1،8 ميلليون ادام نەمەسە بورىشكەرلەردىڭ 34 پايىزى پايدالانعان. مەرزىمى ۇزارتىلعان تولەمدەردىڭ سوماسى – 268 ميلليارد تەڭگە.

ونىڭ ايتۋىنشا، نەسيەنى قايتا قۇرىلىمداۋ ءۇشىن 12،4 مىڭ شوب سۋبەكتىلەرى جۇگىنگەن. بۇل – بانكتىك نەسيەلەرى بار شوب قارىز الۋشىلارىنىڭ 41،5 پايىزى. قايتا قۇرىلىمدالعان تولەمدەردىڭ جالپى سوماسى – 165 ميلليارد تەڭگە.

– تج رەجيمىنىڭ اياقتالۋىنا قاراماستان شوب كاسىپورىندارىنىڭ قىزمەتى بىركەلكى ەمەس جانە تولىق كولەمدە قالپىنا كەلگەن جوق. تاۋارلار مەن قىزمەتتەرگە سۇرانىس كولەمىنىڭ قىسقارۋى بايقالادى، اينالىم مەن اقشالاي ءتۇسىم تومەندەدى، دەمەك الىنعان كرەديتتەر بويىنشا مىندەتتەمەلەرگە قىزمەت كورسەتۋ مۇمكىندىگى تومەندەدى.

شوب سۋبەكتىلەرىن قولداۋدىڭ قوسىمشا شارالارى ىسكە اسىرىلىپ جاتىر. 2020 جىلعى 16 ماۋسىمنان باستاپ 15 قىركۇيەككە دەيىن شوب سۋبەكتىسى بانككە نەمەسە ميكروقارجى ۇيىمىنا قوسىمشا قولداۋ شارالارىن ۇسىنۋ تۋرالى وتىنىشپەن جۇگىنۋگە قۇقىلى. كرەديتتىك ۇيىمدار ءاربىر كاسىپكەر بويىنشا ونىڭ قارجىلىق جاعدايىن، تج مەن كارانتيننىڭ قارجى-شارۋاشىلىق قىزمەتىنە اسەرىن جانە شوب سۋبەكتىسىنىڭ قارجىلىق جاي-كۇيىن قالپىنا كەلتىرۋ پەرسپەكتيۆالارىن جەكە باعالايدى. ناشارلاعان جاعدايدا قولداۋدىڭ ەكى باعىتى ۇسىنىلادى، – دەدى ءابىلقاسىموۆا.