پرەزيدەنت قاسىم-جومارت توقايەۆ توتەنشە جاعداي الىنعاننان كەيىن قازاقستاندىقتاردىڭ ەركىنسىپ كەتكەنىن ايتتى. 

– بۇگىندە بۇكىل الەمدە كوروناۆيرۋستىڭ تارالۋى قورقىنىشتى اۋقىمعا يە بولىپ كەلەدى. كوروناۆيرۋس شابۋىلىنا ۇشىراعان جالعىز ەل ءبىز ەمەسپىز. توتەشە جاعداي رەجيمى الىنىپ تاستالعاننان كەيىن ءبىز ەركىنسىپ كەتتىك، ونى مويىنداۋ قاجەت. كەيبىر ازاماتتار مەن مەملەكەتتىك قىزمەتشىلەر «ءقاۋىپتى كەزەڭ ارتتا قالدى، ءوتىپ كەتتى» دەپ ويلادى. تاۋەكەلدى دۇرىس باعالاماۋ ورىن الىپ، مەديسينالىق ەرەجەلەر مەن ۇيعارىمداردى ساقتاۋدى قويدىق. جەكەلەگەن ازاماتتار مۇنداي اۋرۋ جوق دەگەن وسەك-اياڭعا سەنە باستادى. ءبىراق، COVID-19 ءالى دە بولسا ۇلكەن قاتەر ءتوندىرىپ تۇر. سوندىقتان ۇكىمەت كارانتين شارالارىن قايتا كۇشەيتتى، – دەدى توقايەۆ «BIZ BIRGEMIZ» ونلاين فورۋمدا. 

دەگەنمەن توقايەۆ كۇيزەلىسكە بوي الدىرۋدىڭ ەش قاجەتتى جوق ەكەنىن، تولىققاندى ءومىر ءسۇرۋدى جالعاستىرا بەرۋ كەرەكتىگىن ايتتى. 

– بۇكىل الەمدە ادامدار كارانتين كەزىندە وتباسىمەن جاقىنداسا تۇسكەندىكتەرى، بالالارىنا، ولاردىڭ پروبلەمالارى مەن الاڭداۋشىلىقتارىنا كوپ كوڭىل بولە باستاعاندىقتارى تۋرالى وقيعالارىمەن بولىسۋدە. سۋرەتشىلەر، مۋزىكانتتار، جازۋشىلار، اقىندار كارانتين ۋاقىتىندا شىعارماشىلىقپەن ءونىمدى جۇمىس ىستەگەندىكتەرىن ايتۋدا، – دەدى قاسىم-جومارت توقايەۆ.

مەملەكەت باسشىسى ەڭ جامان جاعدايدا دا ءتيىمدى دۇنيە تابۋعا بولاتىندىعىن اتاپ ءوتتى.

– ءاربىر داعدارىستا جاڭا مۇمكىندىكتەر بولادى. ءبىز بىرگەمىز. ءبىز بىرگە مىندەتتى تۇردە بۇل داعدارىستى دا ەڭسەرەمىز. ودان كۇشتى رۋحمەن، دۇنيەتانىم ماسەلەلەرىنە جاڭاكوزقاراسپەن شىعامىز. ەڭ باستىسى وسىناۋ كۇردەلى سىناقتى ەڭسەرەتىندىگىمىزگە، جەڭەتىندىگىمىزگە سەنىم بولۋى كەرەك، – دەدى مەملەكەت باسشىسى.