ماڭعىستاۋداعى بارلىق قالا مەن اۋداندارداعى پۋلمونولوگيالىق پروۆيزورلارداعى ورىنداردىڭ سانىن ارتتىرۋ باعىتىندا جۇمىستار جۇرگىزىلۋدە. بۇل تۋرالى وبلىس اكىمدىگىنىڭ رەسمي سايتىندا حابارلاندى.

ناۋقاستاردىڭ كوپتىگىنە وراي بەينەۋ اۋدانى مەن جاڭاوزەن جانە اقتاۋ قالالارىنا باسىمدىق بەرىلۋدە. مىسالى، بەينەۋ اۋدانىنىڭ ورتالىعىندا 55 ورىن پروۆيزورلىق ستاسيونار دايىندالدى. جاڭاوزەندە 75 ورىندىق پروۆيزورلىق ورتالىق ازىرلەندى.

ال، اقتاۋدا ناۋقاستار سانى كوپ. سەبەبى قالاعا ىرگەلەس جاتقان مۇنايلى اۋدانىنىڭ، ءتۇپقاراعان مەن قاراقيا اۋداندارىنىڭ تۇرعىندارى دا وبلىس ورتالىعىنا كەلىپ، شاعىمدارىن بىلدىرەدى. وسىعان بايلانىستى اقتاۋدا 4 بىردەي پۋلمونولوگيالىق پروۆيزور ورتالىعى ىسكە قوسىلعان.

♦ءبىرىنشىسى – اقتاۋداعى 1-شاعىن اۋداندا ورنالاسقان بۇرىنعى قالالىق پەرزەنتحانادا جاساقتالعان 100 ورىندىق پروۆيزورلىق گوسپيتال؛

♦ەكىنشىسى – 1-شاعىن اۋدانداعى بۇرىنعى تۋبەركۋلەزگە قارسى ديسپانسەردىڭ بازاسىندا اشىلعان 100 ورىندىق پروۆيزورلىق گوسپيتال،

♦ءۇشىنشىسى – وبلىستىق اۋرۋحانانىڭ «ب» بلوگىندا قۇرىلعان 300 ورىندىق پروۆيزورلىق ورتالىق (مۇندا ءقازىر 75 ورىن بوس تۇر)؛

♦ ءتورتىنشىسى – "پريمورسكيي" شاعىن اۋدانىنداعى جاعاجايدا ورنالاسقان "تەننيس ورتالىعىندا" 150 ورىندىق پروۆيزورلىق ستاسيونار جاساقتالدى. بۇل ورتالىق ءقازىر ناۋقاستاردى قابىلداۋعا تولىق دايىن، كومەك كورسەتەتىن مەديسينالىق قىزمەتكەرلەر دە بولىنگەن.

سونداي-اق وبلىستىق اۋرۋحاناداعى جوندەۋ جۇمىستارى اياقتالعان سوڭ، 5-6 قاباتتارىنان 150 ورىن پروۆيزورلىق ستاسيونار اشىلادى.