الماتى ءدارىحانالارىندا ءبىر ادامعا 2-3 وراما پاراسەتامول عانا ساتىلاتىن بولادى. بۇل تۋرالى قالا اكىمدىگىنىڭ دارىلىك پرەپاراتتارمەن قامتاماسىز ەتۋ جونىندەگى ۇيلەستىرۋشىسى زاڭعار سالىمبايەۆ ايتتى.

قازاقپارات ءتىلشىسىنىڭ حابارلاۋىنشا بۇل ءدارى تاپشىلىعىن بولدىرماۋ ماقساتىندا جاسالىپ وتىر.

– ءبىز الەۋمەتتىك جەلىدە ۇلكەن دۇربەلەڭ ءجۇرىپ جاتقانىن كورىپ وتىرمىز. ادامدار ءوزىن-وزى ەمدەۋمەن اينالىسىپ كەتكەن. تۇرعىندار تاراپىنان دارى-دارمەكتىڭ بەلگىلى ءبىر تۇرلەرىنە سۇرانىس وتە جوعارى بولىپ تۇر. ايتالىق، ادامعا نە ءبارى 2 وراما پاراسەتامول قاجەت بولعانىمەن ول 20 وراماسىن ءبىراق ساتىپ الادى. بارلىعىن دا دارى-دارمەكتىڭ جەتكىلىكتى سانىمەن قامتاماسىز ەتۋ ءۇشىن ءبىز ءبىر ادامعا 2-3 وراما عانا شارالارىن قولعا العىمىز كەلەدى. بۇل بۇگىنگى كۇنى سۇرانىسى جوعارى بولىپ وتىرعان دارىلەرگە دە قاتىستى بولماق، – دەدى زاڭعار سالىمبايەۆ.

سالىمبايەۆتىڭ ناقتىلاي تۇسۋىنشە، ءدارىحانالاردا ساتىلىمى شەكتەلەتىن 6-7 ءدارى بولادى.

– پاراسەتامول، سۋمامەد جانە ادامدار جاپپاي ساتىپ الىپ جاتقان ءدارىنىڭ وزگە دە تۇرلەرى بار. بۇل دارىلەردىڭ ساتىلىمىنا شەكتەۋ ەنگىزەمىز. دەگەنمەن، ولار قالا ءدارىحانالارىنا جەتكىلىكتى كولەمدى جەتكىزىلەتىن بولادى، – دەدى ول.

الماتى قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى مۇرات مۇحامەدياروۆ دۇيسەنبىگە قاراي ساتىلىمعا 250 مىڭ وراما پاراسەتامول كەلىپ تۇسەتىنىن اتاپ ءوتتى.

– تاياۋ ۋاقىتتا قالاعا ۆيرۋسقا قارسى 70 مىڭ وراما ءدارى جەتكىزىلەدى. قىزۋ تۇسىرەتىن جانە ۆيرۋسقا قارسى پرەپاراتتاردىڭ بار بولۋىنا كۇندەلىكتى مونيتورينگ جۇرگىزىپ وتىرامىز، – دەدى ول.

مۇنان بولەك، دۇيسەنبى كۇنى 30 مىڭ تەرمومەتر قالا ءدارىحانالارىندا ساتىلىمعا شىعارىلماق.

– مۇنداي شەشىم اكىمدىكپەن جانە الماتى قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىمەن كەلىسىلگەن. بۇل ادامدار ءتۇسىنىپ ءارى تۇسىنىستىك تانىتۋى ءۇشىن جاسالىپ وتىر. ويتكەنى، مۇنداي بولماۋى كەرەك. ءوزىن-وزى ەمدەۋمەن اينالىسۋعا بولمايدى، – دەپ تۇسىندىرەدى قازاقستاننىڭ فارماسيەۆتيكالىق قىزمەتىن قولداۋ جانە دامىتۋ قاۋىمداستىعىنىڭ پرەزيدەنتى مارينا دۋرمانوۆا.

تاعى وقىڭىز:

♦ الماتى ءدارىحانالارىنداعى دۇربەلەڭ. پاراسەتامول، اسپيرين تاپشى (ۆيدەورەپورتاج)