قالا اكىمى باقىتجان ساعىنتايەۆ ب ا ق وكىلدەرىنە ارناعان ءوزىنىڭ قۇتتىقتاۋىندا قازىرگى زاماناۋي كەزەڭدەگى جۋرناليستەر جۇمىسىنىڭ ماڭىزى مەن ءمانىن ەرەكشە اتاپ ءوتتى.

قالا اكىمى قۇتتىقتاۋ سوزدەرىن Twitter-دەگى ءوزىنىڭ رەسمي پاراقشاسىندا جاريالادى.

– الماتىنىڭ جۋرناليستەر قاۋىمداستىعىن كاسىبي مەرەكەلەرىمەن قۇتتىقتايمىن! ۋاقىت تەزىنەن قالىسپاي، حالىققا ناقتى ءارى ساۋاتتى اقپارات تاراتىپ، كاسىبي مىندەتتى ادال اتقارىپ كەلەسىزدەر! ارمان-تىلەكتەرىڭىز ورىندالسىن، تابىس پەن ساتتىلىك تىلەيمىن!، – دەپ جازدى ب. ساعىنتايەۆ.

ايتا كەتەرلىگى، قالا اكىمىنىڭ تاپسىرماسى بويىنشا قالانىڭ بارلىق قىزمەتتەرى جۇمىستارىندا اشىق ءارى جەدەل ءۇن قاتۋ قاعيداتىن باسشىلىققا الۋدا. سوندىقتان بارلىق اۋدانداردىڭ اكىمدەرى، باسقارما باسشىلارى الەۋمەتتىك جەلىلەرگە تىركەلگەن جانە تۇرعىنداردىڭ ءتۇرلى وتىنىمدەرىنە دەر كەزىندە جاۋاپ بەرۋدە.

الماتى اكىمدىگىندە العاش رەت باسپا ءسوز ورتالىعى قۇرىلدى. مۇندا اۋداندىق اكىمدىكتەر، باسقارمالار مەن قۇرىلىمدىق بولىمشە باسشىلارى ءتۇسىندىرۋ جۇمىستارىن جۇرگىزىپ، ب ا ق سۇراقتارىنا جاۋاپ بەرەدى.

جىل باسىنان بەرى 167 باسپا ءسوز ءماسليحاتى وتكىزىلىپ، 366 سپيكەر 1685 سۇراققا جاۋاپ بەردى. بۇل رەتتە 131 باسپا ءسوز ءماسليحاتى COVID-19-عا قارسى ءىس-قيمىل تاقىرىبىنا ارنالدى. 199 سپيكەر كۆي بويىنشا 1339 سۇراققا جاۋاپ بەردى.

توتەنشە جاعداي كەزىندە قالا اكىمدىگىنىڭ باسپا ءسوز قىزمەتى WhatsApp مەسسەندجەرىندە ارنايى چات اشىپ، كوروناۆيرۋس ينفەكسياسىنا قارسى كۇرەستىڭ جاعدايى تۋرالى جۋرناليستەرگە جەدەل اقپارات بەرىپ وتىردى.

قازاقستاندا تىركەلگەن 3،5 مىڭعا جۋىق باق-تىڭ مىڭنان استامى الماتىدا جۇمىس ىستەيدى. سونىڭ ىشىندە 937 مەرزىمدى باسىلىم، 54 ەلەكتروندىق جانە 93 ينتەرنەت-باق بار.