بۇگىن الەۋمەتتىك جەلىدە «سارىاعاش اۋدانىندا تۇستەن كەيىن ۆيرۋس سەبىلەدى ەكەن، بالالاردى دالاعا شىعارماڭىزدار» دەگەن اقپارات تاراتىلعان. الايدا اقپاراتتىڭ جالعان ءارى شىندىققا جاناسپايتىنى انىقتالدى. بۇل تۋرالى تۇركىستان وبلىسى اكىمىنىڭ باسپا ءسوز قىزمەتى حابارلادى.
"قازىرگى ۋاقىتتا وتىرار اۋدانىنىڭ 1973 جىلى تۋعان تۇرعىنى انىقتالدى. ايەل WhatsApp ارقىلى جالعان اقپارات تاراتقان. وسىلايشا ول اكىمشىلىك جاۋاپكەرشىلىككە تارتىلدى" دەلىنگەن حابارلامادا.
تۇركىستان وبلىسىنىڭ باسپا ءسوز قىزمەتى تۇرعىنداردان وسى سەكىلدى ماتىندە جاريالانعان اقپاراتتارعا سەنبەۋگە شاقىرىپ، دالەل-دايەكسىز، ەل ءىشىن دۇرلىكتىرەتىن اقپارات تاراتقانداردى ق ر قىلمىستىق كودەكسىنىڭ 274 بابى "كورىنەۋ جالعان اقپارات تاراتۋ" بويىنشا جاۋاپقا تارتىلاتىنىن ەسكەرتتى.
ايەل وزىنە حابارلاما مەسسەندجەردەگى باسقا توپتاردان كەلگەنىن ايتتى. ول اقپاراتتىڭ جالعان ەكەنىن بىلمەگەنىن جانە بۇدان كەيىن مۇنداي جالعان مالىمەت تاراتپايتىنىن جەتكىزدى.
پىكىر قالدىرۋ