بەلگىلى ەسترادا جۇلدىزى، اتاقتى «مۋزارت» توبىنىڭ ءانشىسى، ساكەن مايعازييەۆ قازاقستاندىقتاردى سابىرعا شاقىرىپ، كۇيزەلىسكە تۇسپەۋگە كەڭەس بەردى.

ت.ق.جۇرگەنوۆ اتىنداعى قازاق ۇلتتىق ونەر اكادەمياسىنىڭ شىعارماشىلىق ءبولىمىنىڭ كوركەمدىك جەتەكشىسى ساكەن مايعازييەۆتىڭ ايتۋىنشا، تۇتقيىلدان كەلگەن كوروناۆيرۋس دەرتى جەر بەتىنە قاۋىپ-قاتەر توندىرۋدە. ادامزاتقا بۇرىن-سوڭدى بولماعان اۋىر سالماق ءتۇسىردى.

– مىنا جاھاندى جايلاعان پاندەميا ەشكىمدى بەيجاي قالدىرىپ وتىرعان جوق. جاقىندارىمىز، تانىستارىمىز كوز الدىمىزدا اۋىرىپ جاتىر. سونى كورىپ ءبىزدىڭ دە جۇرەگىمىز تىنشىماي جاتىر. كەز كەلگەن اۋرۋ ادامنىڭ كۇيگەلەكتىگىنەن، سترەستتەن، اۋىر قابىلداۋدان ءورشيدى. ونى الەمدىك عالىمدار دالەلدەدى، – دەيدى ساكەن مايعازييەۆ.

سونىمەن قاتار، ول ىندەتتىڭ جەر ءجۇزىن ۇرەي قۇرساۋىندا ۇستاپ وتىرعانىن ايتتى. اۋرۋعا شالدىققاندار سانى كۇن ساناپ ۇلعايىپ، كوز جۇمعانداردىڭ قاتارى كوبەيدى.

– سوندىقتان كۇيزەلىسكە تۇسپەۋ كەرەك. بويىمىزدى قورقىنىش پەن ۇرەيدەن ارىلتۋ قاجەت. مەيلىنشە كوڭىلدى جۇرۋگە تىرىسايىق. كەرىسىنشە جان-جاعىمىزداعى جاقىندارىمىزدى جۇباتىپ، سولاردىڭ كوڭىلىن اۋلاۋعا بارىمىزدى سالايىق. وسى ىندەتتەن امان-ەسەن شىعۋىمىزدى اللا تاعالا ءناسىپ ەتسىن. سابىرلىق تانىتايىق. بۇل قيىندىقتى دا ەڭسەرەمىز. ءبارى جاقسى بولادى. بارشاڭىزدى اۋىزبىرلىككە، سابىرعا شاقىرامىن. قازاق ەلى كوروناۆيرۋستى جەڭەدى، – دەدى ساكەن مايعازييەۆ.

دەرەككوز: قازاقپارات