بەردىبەك ساپاربايەۆ جامبىلدىقتاردىڭ دارىگەرلەر مەن دارى-دارمەك تاپشىلىعىنا قاتىستى شاعىمدارى بويىنشا كەڭەس وتكىزدى دەپ حابارلادى قازاقپارات.
جامبىلدىقتار جەدەل جاردەم مەن مەديسينالىق مەكەمەلەردىڭ جۇمىسىنىڭ ناشارلىعىنا، اۋرۋحانالارداعى توسەك-ورىندار مەن ءدارىحانالارداعى دارى-دارمەكتەردىڭ جەتىسپەۋشىلىگىنە قاتىستى ءجيى شاعىمدانۋدا.
وسى ورايدا جامبىل وبلىسىنىڭ اكىمى بەردىبەك ساپاربايەۆ باس دارىگەرلەرمەن، ءدارىحانا جەلىلەرىنىڭ وكىلدەرىمەن جانە ديستريبيۋتورلارمەن كەزدەسۋ وتكىزدى. وندا قالىپتاسىپ وتىرعان جاعدايدىڭ سەبەبى مەن قوردالانعان ماسەلەلەردىڭ شەشۋ جولدارى سارالاندى.
وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆتىڭ ايتۋىنشا، پروۆيزورلىق ستاسيونارلارداعى توسەك قورىنىڭ تولتىرىلۋى شامامەن 50 پايىزدى قۇرايدى. ول دارىگەرلەر از بولعاندىقتان، ناۋقاستاردى قابىلداۋعا ۋاقىتتارى جەتپەي وتىرعاندىعىن العا تارتتى.
بەردىبەك ساپاربايەۆ قابىلداۋ بولىمىندەگى دارىگەرلەر سانىن كوبەيتۋدى تاپسىردى.
«ادامدار اۋرۋحاناعا كەلىپ، قابىلداۋ بولىمىندە بىرنەشە ساعات كەزەك كۇتىپ وتىرادى. ناۋقاستارعا بارلىق قولايلى جاعداي جاساۋدىڭ ورنىنا اۋرۋحانالار ودان ءارى ناشارلاتادى. جاعدايدى تەز ارادا تۇزەتۋ قاجەت»، - دەدى بەردىبەك ساپاربايەۆ.
تۇرعىندار اۋرۋحاناعا جاتقىزىلعاننان كەيىن دە قاجەتىنشە ەمدەۋ شارالارىن الا المايتىندىقتارىنا، دارى-دارمەكتەردىڭ جەتىسپەۋشىلىگىنە شاعىمدانۋدا.
«سك-فارماسيا» ج ش س وكىلدىگىنىڭ باسشىسى ايجان تورتايەۆانىڭ ايتۋىنشا، پنيەۆمونيامەن اۋىراتىن ناۋقاستاردىڭ كوبەيۋىنە بايلانىستى جۋىردا 25،3 ميلليون تەڭگەگە شۇعىل دارى-دارمەكتەر جەتكىزىلدى. ول مەديسينالىق ۇيىمداردىڭ ءوتىنىشى بويىنشا دارى-دارمەكتەردى جەتكىزۋدى جالعاستىرا بەرەتىنىن ايتتى. بۇل ماسەلەنى باقىلاۋدا ۇستاۋ مارات جۇمانقۇلوۆقا تاپسىرىلدى.
دارىگەرلەر ناۋقاستارمەن عانا ەمەس، سونىمەن بىرگە ولاردىڭ تۋىستارىمەن دە بايلانىس ورناتا الماۋدا. تۋىستارى دارىگەرلەردەن ناۋقاستاردىڭ جاعدايى تۋرالى اقپارات المايتىنىن ايتادى. بۇل تۇرعىداعى شاعىم ۋاقىتشا پروۆيزورلىق ستاسيونار بولىپ جابدىقتالعان وبلىستىق كوپسالالى بالالار اۋرۋحاناسى دارىگەرلەرىنىڭ ۇستىنەن تۇسكەن. اۋرۋحانانىڭ باس دارىگەرى ازات ءساتجانوۆ بۇل كەمشىلىكتەر بويىنشا جۇمىستار اتقارىلعانىن، دارىگەرلەرمەن تۇسىندىرۋلەر جۇرگىزىلگەنىن جەتكىزدى. قازىرگى ۋاقىتتا اۋرۋحانادا جەدەل ورتالىق جۇمىس ىستەيدى.
«باس دارىگەرلەر كابينەتتە تىعىلىپ وتىرماي، شىعىپ، ادامدارعا قازىرگى جاعدايدى ءتۇسىندىرۋى كەرەك. سونىمەن قاتار، قيىن جاعدايلارداعى ازاماتتاردىڭ دەنساۋلىعىن ساقتاۋ ءۇشىن شۇعىل ناقتى شارالار قابىلداۋى ءتيىس»، - دەدى ايماق باسشىسى.
جيىندا تاعى ءبىر وزەكتى ماسەلە رەتىندە جەدەل جاردەمنىڭ كەلۋ ۋاقىتىنىڭ بىرنەشە ساعاتقا سوزىلاتىندىعى ايتىلدى. وبلىستىق مەديسينالىق جەدەل جاردەم ستانسياسىنىڭ باس دارىگەرىنىڭ م.ا. ۇلپان پىحىبايەۆانىڭ ايتۋىنشا، ديسپەچەرلىك قىزمەتتىڭ جۇكتەمەسى ەكى ەسەگە ارتقان.
«ناۋقاس جەدەل جاردەم قىزمەتىن بىرنەشە ساعات كۇتەتىن بولسا، وندا كەدەرگىسىز مەديسينالىق كومەك تۋرالى ءسوز ايتۋدىڭ ءوزى ارتىق شىعار. جەدەل جاردەم بريگادالارىنىڭ سانىن كوبەيتۋ جانە ولاردىڭ جۇمىسىن جۇيەلەۋ قاجەت»، - دەپ تاپسىرما بەردى بەردىبەك ساپاربايەۆ.
سونداي-اق، وبلىس اۋماعىنداعى ءدارىحانالاردا ۆيرۋسقا قارسى جانە قىزۋ تۇسىرەتىن دارىلەردىڭ جەتىسپەۋشىلىگى بايقالادى. ءدارىحانالار جەلىسىنىڭ وكىلدەرى تۇرعىنداردىڭ وزدەرى مۇنداي احۋالدى قولدان جاساپ وتىرعاندىعىن تىلگە تيەك ەتتى. دارى-دارمەكتى نەگىزىنەن ساۋ ادامدار ساتىپ الۋدا. ءقازىر ولار ديستريبيۋتورلارمەن جەتكىزۋدىڭ جاڭا ماسەلەلەرىن تالقىلاپ جاتقاندىقتارىن ايتادى.
بەردىبەك ساپاربايەۆ دەنساۋلىق ساقتاۋ باسقارماسى مەن تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە حالىق اراسىندا ءاقپاراتتىق-تۇسىندىرۋ جۇمىستارى ءتيىستى دەڭگەيدە جۇرگىزىلمەگەي وتىرعاندىعىن ەسكەرتتى. ايماق باسشىسى سونداي-اق ءدارىحانا جەلىلەرىنىڭ وكىلدەرىنە باعانى شەكتى باعادان جوعارى كوتەرۋگە بولمايتىنىن باسا ايتتى.
وتىرىستى قورىتىندىلاي كەلە، بەردىبەك ساپاربايەۆ كوروناۆيرۋس پاندەمياسىمەن كۇرەس ءجۇرىپ جاتقان قازىرگىدەي قيىن ۋاقىتتا مۇنداي ولقىلىقتارعا جول بەرۋگە بولمايتىندىعىن اتاپ ءوتتى.
«ازاماتتارىمىزدىڭ ءومىرى مەن دەنساۋلىعى – بارىنەن باعالى. ءبىز ولاردى قورعاۋ ءۇشىن بار كۇش-جىگەرىمىز بەن مۇمكىندىكتەرىمىزدى باعىتتاۋىمىز كەرەك»، - دەپ تۇيىندەدى ايماق باسشىسى.
پىكىر قالدىرۋ