ەلباسىنىڭ اتىنا ەلوردا كۇنى مەن قازاقستاننىڭ تۇڭعىش پرەزيدەنتىنىڭ 80 جىلدىق مەرەيتويىنا وراي كەلىپ جاتقان جەدەلحاتتار مەن حاتتار لەگى جالعاسۋدا دەپ حابارلادى ەلباسىنىڭ رەسمي سايتى.

بەلارۋس رەسپۋبليكاسىنىڭ پرەزيدەنتى قازىرگى قازاقستاننىڭ تاريحى، ونىڭ جەتىستىكتەرى مەن حالىقارالىق بەدەلى نۇرسۇلتان نازاربايەۆتىڭ اتىمەن تىعىز بايلانىستى ەكەندىگىن اتاپ ءوتتى.

«ءسىزدىڭ تىكەلەي باسشىلىعىڭىزبەن قازاقستان حالقى الەۋمەتتىك-ەكونوميكالىق دامۋدا تولاعاي تابىستارعا قول جەتكىزدى، الەمدىك ارەنادا لايىقتى بەدەلگە يە بولعان مەملەكەت قۇرىپ، ۇلكەن جولدى ءجۇرىپ ءوتتى.

بەلارۋس رەسپۋبليكاسىندا ءسىزدىڭ بەلورۋستار مەن قازاقتاردىڭ تاريحي دوستىعىنا، ءوزارا قۇرمەتكە، سەنىم مەن قولداۋعا نەگىزدەلگەن كەڭ اۋقىمدى ەكىجاقتى قاتىناستاردى قۇرۋعا قوسقان زور ۇلەسىڭىزدى جوعارى باعالايدى»، - دەلىنگەن ا.لۋكاشەنكونىڭ جەدەلحاتىندا.

گرۋزيا پرەزيدەنتى سالومە زۋرابيشۆيلي ەلباسىنا دەنساۋلىق، باقىت پەن تابىس تىلەدى.

«قازاقستان رەسپۋبليكاسىنىڭ مەملەكەتتىك تاۋەلسىزدىگىن قالىپتاستىرۋ جانە نىعايتۋ كەزەڭى ءسىزدىڭ اتىڭىزبەن تىعىز بايلانىستى. ءسىز تۇڭعىش پرەزيدەنت رەتىندە باتىل شەشىم قابىلداپ جانە كورەگەن ساياسات جۇرگىزە وتىرىپ، ەلدىڭ دەربەس دامۋىن جانە حالىقتىڭ ءال-اۋقاتىنىڭ ءوسۋىن قامتاماسىز ەتىپ، اۋقىمدى رەفورمالاردى جۇزەگە اسىرۋ ءۇشىن بەرىك نەگىز قالادىڭىز. سونداي-اق قازاقستاننىڭ حالىقارالىق بەدەلگە قول جەتكىزۋىنە ىقپال ەتتىڭىز»، - دەلىنگەن گرۋزيا پرەزيدەنتىنىڭ جەدەلحاتىندا.

اۆستريا رەسپۋبليكاسىنىڭ فەدەرالدىق پرەزيدەنتى الەكساندر ۆان دەر بەللەن ءوزىنىڭ حاتىندا نۇرسۇلتان نازاربايەۆتىڭ قازاقستاننىڭ حالىقارالىق بەدەلىن نىعايتۋداعى جانە قۇرلىقتاعى ينتەگراسيالىق ۇدەرىستەردى دامىتۋداعى ەرەكشە ءرولىن اتاپ ءوتتى.

حورۆاتيا رەسپۋبليكاسىنىڭ پرەزيدەنتى زوران ميلوۆيچ، يندونەزيا رەسپۋبليكاسىنىڭ پرەزيدەنتى دجوكو ۆيدودو، سينگاپۋر رەسپۋبليكاسىنىڭ پرەزيدەنتى حاليما ياكۋب، سەررا-لەونە رەسپۋبليكاسىنىڭ پرەزيدەنتى دجۋليۋس ماادا بيو ەلباسىنا جانە كۇللى قازاقستان حالقىنا مىقتى دەنساۋلىق پەن باق-بەرەكە تىلەدى. سونداي-اق بارلىق ماقساتتارعا جەتۋىنە جانە وسىپ-وركەندەي بەرۋىنە تىلەكتەستىك ءبىلدىرىپ، جىلى لەبىزدەرىن جولدادى.

جاپونيا پرەمەر-مينيسترى سيندزو ابە قازاقستاننىڭ تۇڭعىش پرەزيدەنتىنە ەكى ەل اراسىندا ىنتىماقتاستىق ورناتۋعا جانە دامىتۋعا قوسقان ۇلەسى ءۇشىن العىسىن ءبىلدىردى.

«ءسىزدى 80 جىلدىق مەرەيتويىڭىزبەن شىن جۇرەكتەن قۇتتىقتايمىن.  ەكەۋمىزدىڭ ارامىزداعى جەكە سەنىمگە نەگىزدەلگەن جاپونيا مەن قازاقستاننىڭ ءوزارا ءتيىمدى سەرىكتەستىگى ءساتتى دامىپ كەلە جاتقانىنا قۋانىشتىمىن. وتكەن جىلدىڭ قازان ايىندا مارتەبەلى يمپەراتوردىڭ تاققا وتىرۋ راسىمىنە قاتىسقانىڭىز ءۇشىن سىزگە تاعى دا العىس ايتامىن. سول ماڭىزدى كۇنى وزىڭىزبەن بولعان كەزدەسۋ ەكىجاقتى قاتىناستارعا جاڭا سەرپىن بەردى»، - دەلىنگەن سيندزو ابەنىڭ جەدەلحاتىندا.

ۆەنگريا پرەمەر-مينيسترى ۆيكتور وربان نۇرسۇلتان نازاربايەۆتىڭ تاۋەلسىز قازاقستاننىڭ بەرىك نەگىزىن قالاعانىن اتاپ ءوتتى.

«ءسىز ءححى عاسىردىڭ حالىقارالىق ساياساتىن جانە جاڭا الەمدىك ءتارتىپتى ءتۇسىنىپ قانا قويماي، ونى ءوز حالقىڭىزدىڭ يگىلىگى جولىندا قالاي باعىتتاۋ كەرەكتىگىن بىلەتىن تۇلعاسىز. سوندىقتان ءسىزدى وزىمە رۋحاني جاقىن كوشباسشى سانايمىن. مەن ۇنەمى ءبىزدىڭ اڭگىمەلەرىمىزدى جىلى سەزىممەن ەسكە الامىن»، - دەپ جازدى ۆ.وربان.

سونداي-اق كانادانىڭ گەنەرال-گۋبەرناتورى دجۋلي پايەتت پەن سينگاپۋردىڭ پرەمەر-مينيسترى لي سيان لۋن دا قۇتتىقتاۋ حاتتارىندا تولاعاي تابىس پەن جاڭا بەلەستەر تىلەدى.