الماتى اكىمى باقىتجان ساعىنتايەۆ COVID-19 تارالۋىن بولدىرماۋ ءۇشىن 5 شىلدەدەن باستاپ قالادا قاتاڭ شەكتەۋ شارالار ەنگىزىلەتىنىن حابارلادى. بۇل تۋرالى ول Facebook پاراقشاسىندا جازدى.
– 5 شىلدەنىڭ ءتۇن جارىمىنان قالاداعى سانيتارلىق-ەپيدەميولوگيالىق جاعدايدى تۇراقتاندىرۋ ماقساتىندا شەكتەۋ شارالارىن ەنگىزەمىز. ءبىرقاتار ۇيىمداردىڭ، ساۋدا جانە قىزمەت كورسەتۋ نىساندارىنىڭ جۇمىستارى ەكى اپتاعا توقتاتىلادى. ولاردىڭ تىزىمىمەن رەسمي سايتتا جاريالانعان قالانىڭ مەملەكەتتىك باس سانيتارلىق دارىگەرىنىڭ قاۋلىسىنان وقىپ، بىلۋگە بولادى. جۇمىس ىستەۋگە رۇقسات ەتىلگەندەردىڭ سانيتارلىق نورمالاردى ساقتاۋلارى قاتاڭ باقىلاۋعا الىنادى. بۇگىن ءبىز دەنساۋلىق ساقتاۋ جۇيەسىنىڭ ماتەريالدىق تەحنيكالىق بازاسىن كۇشەيتۋدى جالعاستىرۋدامىز، – دەدى شاھار باسشىسى.
وسىلايشا ول پروۆيزورلىق جانە قارانتيندىك ورتالىقتاردى كەڭەيتىپ، مەديك مامانداردى دايىنداپ جاتقانىن اتاپ ءوتتى.
– ءبىزدىڭ دارىگەرلەرگە وتە ۇلكەن سالماق تۇسۋدە. COVID-19-بەن اۋىرعان ناۋقاستار سانى ارتۋدا. سوندىقتان ءاربىر الماتىلىقتىڭ قارىم-قاتىناستى، بايلانىستى بارىنشا شەكتەۋى وتە ماڭىزدى. ءوزىن-وزى وقشاۋلاۋ مەن سانيتارلىق نورمالاردى قاتاڭ ساقتاۋ – ءومىر ءسۇرۋدىڭ باستى ەرەجەسىنە اينالۋدا. ەكى اپتادان سوڭ جۇمىس جاساۋدى ۇزارتۋ نەمەسە توقتاۋ تۋرالى شەشىم قابىلدانادى. وسىناۋ ۋاقىتشا قيىندىقتى جەڭۋ ءۇشىن سانالىلىق پەن جاۋاپكەرشىلىك تانىتاتىنىمىزعا سەنەمىن، – دەدى ساعىنتايەۆ.
