23 ماۋسىمدا مەملەكەتتىك قىزمەتشىلەر وزدەرىنىڭ كاسىبي مەرەكەسىن اتاپ وتەدى. الماتى اكىمى باقىتجان ساعىنتايەۆ ءوزىنىڭ Twitter- دەگى پاراقشاسىندا مەملەكەتتىڭ قىزمەتشى جۇمىسىنىڭ نەگىزگى قاعيدالارىن اتاپ ءوتتى.

– مەملەكەتتىك قىزمەتشى كۇنىمەن قۇتتىقتايمىن! ەلگە قىزمەت ەتۋ – مارتەبەلى مىندەت. نەگىزگى قاعيداسى – ءوز ىسىنە ادال بولىپ، ابىروي بيىگىنەن كورىنۋ. ەڭ باستىسى – حالىق ۇنىنە قۇلاق اسىپ، ەل مۇددەسى ءۇشىن ەڭبەك ەتەمىز. دەنساۋلىق پەن تابىس تىلەيمىن، – دەپ جازدى ب. ساعىنتاۆ.

ەسكە سالساق، باقىتجان ساعىنتايەۆ الماتى اكىمى لاۋازىمىنداعى العاشقى جۇمىس كۇنى قالا تۇرعىندارىنا ۇندەۋ جاساپ، Facebook، Instagram جانە Twitter-دە ءوزىنىڭ پاراقشالارىن اشاتىندىعىن حابارلاعان بولاتىن.

– الماتى ءارقايسىمىزدىڭ جۇرەگىمىزدەن ەرەكشە ورىن العان قالا، الماتىعا دەگەن ءار قازاقستاندىقتىڭ ىقىلاسى ەرەكشە. مەنىڭ باستى ماقساتىم – الماتىنىڭ ءار تۇرعىنى بەرەكەلى ءومىر سۇرەتىن، ءقاۋىپسىز دە قولايلى، زامانعا ساي مەگاپوليسكە اينالدىرۋ. ءبىز وعان تەك بىرگە، تىزە قوسىپ ەڭبەك ەتۋ ارقىلى جەتە الامىز. سوندىقتان سىزدەردىڭ تالاپ-تىلەكتەرىڭىزدى ءبىلىپ، ۋاقىتىلى جاۋاپ بەرۋ مەن ءۇشىن وتە ماڭىزدى.

قالانىڭ پروبلەمالارى مەن دامۋ ستراتەگياسىن سىزدەرمەن بىرگە اشىق تالقىلاعىم كەلەدى. بارلىعىمىزدىڭ تاعدىرىمىزبەن بايلانىستى ماڭىزدى شەشىمدەردى ازىرلەپ، قابىلداۋ كەزىندە سىزدەردىڭ قولداۋلارىڭىز مەن ءۇشىن ماڭىزدى. اقىلداسا وتىرىپ، بىرگە جۇمىس ىستەيىك!، — دەگەن بولاتىن سول كەزدە قالا اكىمى.