6 شىلدە – قازاقستاندى 30 جىلعا جۋىق ۇزدىكسىز بيلەپ، بىلتىر ناۋرىز ايىندا ءوز ەركىمەن پرەزيدەنتتىكتەن كەتكەن نۇرسۇلتان نازاربايەۆتىڭ تۋعان كۇنى. ول بۇگىن 80 جاسقا تولىپ وتىر. نازاربايەۆتىڭ تۋعان كۇنى بىلتىر ءوزىنىڭ ەسىمى بەرىلگەن ەل استاناسى نۇر-سۇلتان قالاسىنىڭ كۇنىمەن تۇسپا-تۇس.
سوڭعى جىلدارى قازاقستاندا ازاماتتاردىڭ قارسىلىعىنا قاراماستان، نازاربايەۆقا ەسكەرتكىشتەر قويىلىپ، ونىڭ ەسىمى كوشەگە، ۆوكزالعا، ساياباققا، مەكتەپكە بەرىلە باستادى. كەيبىر ساراپشىلار بۇنى "جەكە باسقا تابىنۋ" دەپ ەسەپتەيدى. ال بيلىكشىل كوزقاراستاعى ادامداردىڭ ويىنشا، بۇل – نازاربايەۆقا كورسەتىلگەن قۇرمەت. قامشى ءتىلشىسى ينتەرنەتتەگى مالىمەتتەردى نەگىزگە الا وتىرىپ، قازاقستاندا جانە شەتەلدەردە نازاربايەۆتىڭ اتى بەرىلگەن كوشەلەر مەن نىساندارعا شولۋ جاسادى.
نازاربايەۆتى قازاقستاننان تىس جەرلەردە دارىپتەۋ
الەمنىڭ بىرنەشە مەملەكەتىندە قازاقستاننىڭ ەكس-پرەزيدەنتىنىڭ اتىندا كوشە بار. ەڭ العاش 2007 جىلى رەسەيدىڭ قۇرامىنداعى شەشەن رەسپۋبليكاسىنىڭ استاناسى گروزنىي قالاسىنداعى ورتالىق كوشەلەردىڭ بىرىنە نازاربايەۆتىڭ اتى بەرىلگەن. كەيىن 2010 جىلى ءدال وسى گروزنىي قالاسىنداعى مەكتەپتەردىڭ ءبىرى دە نازاربايەۆتىڭ ەسىمىمەن اتالدى. بۇدان بولەك، رەسەيدەگى قازان (تاتارستان استاناسى) جانە ماگاس (ينگۋشەتيا استاناسى) قالاسىندا نازاربايەۆ اتىنداعى كوشە بار.
گروزنىي قالاسىنداعى نازاربايەۆ اتىنداعى مەكتەپ
قازاقستاننىڭ ەكس-پرەزيدەنتىنە رەسەيدەن باسقا دا پوستكەڭەستىك ەلدەردىڭ بىرنەشەۋى كوشە بەرىپ، مونۋمەنت قويعان. ولاردىڭ قاتارىندا ارمەنيا، قىرعىزستان جانە ۋكراينا بار.
ارمەنيادا نازاربايەۆتىڭ اتىندا كوشە بولسا، قىرعىزستاندا وعان 2005 جىلى ۇلكەن ەسكەرتكىش قويىلدى. ال ۋكراينانىڭ دنەپرودزەرجينسك قالاسىندا پرەزيدەنت نازاربايەۆ وقىعان كاسىپتىك كوللەدجدە 2011 جىلى نازاربايەۆ مۋزەيى اشىلىپ، پرەزيدەنتتىڭ ءمۇسىنى ورناتىلعان.
قازاقستانمەن باۋىرلاس ەل بوپ سانالاتىن تۇركيادا نازاربايەۆقا دەگەن قۇرمەت ەرەكشە. ينتەرنەتتەگى اقپاراتقا ساي، ءقازىر بۇل ەلدە نازاربايەۆ اتىنداعى ءتورت كوشە جانە ۇلكەن ءبىر ەسكەرتكىش بار.
يوردانيا استاناسى امماندا دا نازاربايەۆقا ءبىر كوشە بەرىلگەن.
تۇركيادا نازاربايەۆقا قويىلعان ەسكەرتكىش
نۇر-سۇلتانداعى نۇرسۇلتان نازاربايەۆ
نازاربايەۆ ەسىمىمەن بايلانىستى نىسانداردىڭ كوپ بولىگى قازاقستاننىڭ استاناسىندا.
بۇل قالادا ونىڭ اتىنداعى نىساندار 2000 جىلدان بەرى پايدا بولا باستادى. ەڭ العاش نازاربايەۆ ەسىمى بەرىلگەن نىساندار قاتارىندا پرەزيدەنت ءارحيۆى مەن كىتاپحاناسى تۇر. ولاردان بولەك، ەل استاناسىندا تۇڭعىش پرەزيدەنت مۇراجايى مەن نازاربايەۆ ۋنيۆەرسيتەتى بار.
قالاداعى تەمىر جول ۆوكزالى مەن اۋەجاي دا نازاربايەۆتىڭ اتىندا.
قازاقستاننىڭ ءىرى قالالارىنىڭ بارىندە جۇمىس ىستەپ جاتقان "نازاربايەۆ زياتكەرلىك مەكتەپتەرىنىڭ" العاشقىسى دا ءدال وسى ەل استاناسىندا اشىلعان.
نازاربايەۆ 2019 جىلى ءوز ەركىمەن پرەزيدەنتتىكتەن كەتكەننىڭ ەرتەسىندە-اق ونىڭ اتىنداعى نىساندار كوبەيە باستادى. ول كەتە سالا ورنىنا كەلگەن سول كەزدەگى سەنات سپيكەرى قاسىم-جومارت توقايەۆ حالىقتىڭ پىكىرىن تىڭداماستان، استانا قالاسىن نۇر-سۇلتان دەپ وزگەرتتى. بۇعان قوسا، توقايەۆ بارلىق وبلىس ورتالىقتارىنداعى ورتالىق كوشەلەردىڭ ءبىرىن نازاربايەۆتىڭ اتىنا وزگەرتۋ تۋرالى بۇيرىق بەردى.
80 جىلدىعى قارساڭىندا ەل استاناسىندا نازاربايەۆتىڭ اتى بەرىلگەن تاعى ءبىر ەسكەرتكىش بوي كوتەردى. ول ەسكەرتكىش ۇلتتىق قورعانىس ۋنيۆەرسيتەتىنىڭ الدىنا قويىلدى. بۇل ۋنيۆەرسيتەت تە نازاربايەۆتىڭ اتىندا.
80 جىلدىعى قارساڭىندا نازاربايەۆقا قويىلعان ەسكەرتكىش
الماتىدا 2010 جىلى ءبىرىنشى پرەزيدەنت ساياباعى اشىلدى. ال 2011 جىلى ساياباققا ونىڭ ۇلكەن ەسكەرتكىشى ورناتىلدى.
تۇڭعىش پرەزيدەنت اتىنداعى ساياباق تاراز، قىزىلوردا جانە اقتوبە قالاسىندا دا بار.
ەكس-پرەزيدەنت تۋرالى وسى ۋاقىتقا دەيىن كوپتەگەن فيلمدەر ءتۇسىرىلىپ، كىتاپتار جازىلدى. ەلدە وعان ولەڭ شىعارعان اقىندار دا، ءان ارناعان كومپوزيتورلار دا كوپ.
پىكىر قالدىرۋ