قازاقستان رەسپۋبليكاسى مادەنيەت جانە سپورت ءمينيسترىنىڭ بۇيرىعىمەن رەجيسسەر اقان ساتايەۆ شاكەن ايمانوۆ اتىنداعى «قازاقفيلم» اق پرەزيدەنت بولىپ تاعايىندالدى.

ۇجىمعا جاڭا باسشىنى مادەنيەت جانە سپورت ۆيسە-مينيسترى نۇرعيسا داۋەشوۆ تانىستىرىپ، الداعى قىزمەتىنە ساتتىلىك تىلەدى.

ايتا كەتەيىك، بۇل قىزمەتتى بۇعان دەيىن ارمان اسەنوۆ اتقارعان بولاتىن.

اقان قارعامباي ۇلى ساتايەۆ 1971 جىلى قاراعاندى قالاسىندا دۇنيەگە كەلگەن.

1994 جىلى الماتى قالاسىنداعى ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ كينو جانە تەليەۆيدەنيە فاكۋلتەتىن ءتامامداعان.

2003 جىلى «Sataifilm» ستۋدياسىنىڭ نەگىزىن قالاپ، 2007 جىلى «رەكەتير» اتتى العاشقى تولىقمەتراجدى ءفيلمىن، «اداسقان» ميستيكالىق تريللەرىن (2009)، «اعايىندى» سەريالىن (2009)، «ليكۆيداتور» پسيحولوگيالىق دراماسىن (2011)، «جاۋجۇرەك مىڭ بالا» تاريحي ءفيلمىن (2012) تۇسىرگەن. سونداي-اق «رايونى» كريمينالدىق دراماسى مەن «اناعا اپارار جول» تاريحي دراماسىنىڭ (2016)، «بيزنەسمەنى» (2018)، «توميريس» (2019) جانە تاعى باسقا تۋىندىلاردىڭ رەجيسسەرى.

2014 جىلى كينويندۋستريا سالاسىنىڭ ۇزدىك وكىلى رەتىندە "حالىق سۇيىكتىسى" ۇلتتىق سىيلىعىنا يە بولدى.

2016 جىلى جاس رەجيسسەرلەردى قولداۋعا باعىتتالعان Astana Film Found قورىنىڭ نەگىزىن قالاعان.