دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، الەمدە كوروناۆيرۋس ينفەكسياسىن جۇقتىرعاندار سانى 12 ميلليونعا جۋىقتادى. ولاردىڭ 535 مىڭنان استامى قايتىس بولدى.

ددسۇ ينفەكسيانىڭ تارالۋى ارتىپ كەلە جاتقانىن ايتىپ جاتىر. وتكەن اپتانىڭ وزىندە الەم بويىنشا 400 مىڭنان استام ادامنان كوروناۆيرۋس انىقتالعان. دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس گەبرەيەسۋستىڭ ايتۋىنشا، ىندەت ورشىسە دە بۇكىل الەم بويىنشا پاندەميا شەكتى دەڭگەيىنە ءالى جەتپەگەن.

كوروناۆيرۋستىڭ تارالۋى بويىنشا ەڭ الدا تۇرعان ەلدەر

ءۇندىستاندا كۇن سايىن 20 مىڭنان استام ادامنان COVID-19 تابىلىپ جاتىر. بۇل ەلدە سوڭعى تاۋلىكتىڭ وزىندە 24 248 ادام وسى ىندەتتى جۇقتىرعان. ءقازىر ءۇندىستان قايتىس بولعاندار سانى بويىنشا الەمدە 8-ورىندا تۇر.

برازيليانىڭ دەنساۋلىق ساقتاۋ مينيسترلىگىنىڭ مالىمەتىنشە، سوڭعى تاۋلىكتە ەلدە 38 مىڭعا جۋىق تۇرعىننان كوروناۆيرۋس ينفەكسياسى انىقتالعان. ءبىر كۇندە مىڭنان اسا ادام قايتىس بولعان. ەل پرەزيدەنتى دجاير بولسونارۋ دا كوروناۆيرۋس جۇقتىردى.

يزرايل پرەمەر-مينيسترى بينيامين نەتانياحۋدىڭ ايتۋىنشا، اپتانىڭ باسىندا ەلدە تاۋلىگىنە 500-گە جۋىق ادامنان كۆي انىقتالىپ جۇرگەن. ال سوڭعى كۇندەرى بۇل كورسەتكىش ەكى ەسەگە ارتقان. كوروناۆيرۋستىڭ ۋشىعۋىنا بايلانىستى بيلىك ەلدەگى قاتاڭ شەكتەۋ شارالارىن قايتا ەنگىزدى. بار، كلۋب، سپورت زالدار جابىلىپ، ءىس-شارالارعا تىيىم سالىندى.

وڭتۇستىك كورەيا دا ماۋسىم ايىنىڭ سوڭىندا ەلدە كوروناۆيرۋستىڭ ەكىنشى تولقىنى باستالعانىن جاريالادى. جەرگىلىكتى بيلىك تەدجون قالاسىنداعى سپورت زالداردى، مۇراجايلار مەن كىتاپحانالاردى جاۋىپ، قاتاڭ شەكتەۋ شارالارىن قايتا ەنگىزدى.

رەسەيدە كوروناۆيرۋس ەلدىڭ قازىرگى پرەزيدەنتى ۆلاديمير ءپۋتيننىڭ رەيتينگىنە اسەر ەتتى. "ليەۆادا" ورتالىعىنىڭ مالىمەتىنشە، ساۋىردە ونىڭ رەيتينگى 59%، ال مامىردا 25% بولعان. بۇل – پۋتين پرەزيدەنت بولعان 20 جىلداعى ەڭ تومەنگى كورسەتكىش. ساراپشىلار پرەزيدەنت رەيتينگىسىنىڭ تومەندەۋىندە كوروناۆيرۋسقا قاتىستى جاعداي ماڭىزدى ءرول اتقارعانىن ايتادى.

ەۋروپاداعى احۋال قالىپقا تۇسكەنىنە قاراماستان، بۇل قۇرلىقتىڭ كەيبىر ەلدەرىندە ىندەت ءالى تارالىپ جاتىر. سەربيا استاناسى بەلگرادتا 10-13 شىلدە ارالىعىندا كومەندانتتىق ساعات ەنگىزىلگەن. قالادا 299 ادامنان COVID-19 انىقتالىپ، 13 ادام قايتىس بولعان. وسى جاعدايعا بايلانىستى سەربيانىڭ 19 قالاسى مەن وبلىسىندا توتەنشە جاعداي جاريالاندى. كارانتيننىڭ جاڭا تالاپتارىنا قارسى شىققان تۇرعىندار بەلگرادتىڭ ورتالىعىندا جاپپاي تارتىپسىزدىك جاسادى. نارازىلىق بىلدىرۋشىلەر پوليسياعا شابۋىل جاساپ، كولىكتەر مەن قوقىس جاشىكتەرىن ورتەگەن. پارلامەنت عيماراتىنىڭ الدىنا 5 مىڭعا جۋىق ادام جينالىپ، ءبىر بولىگى وپپوزيسيا بەلسەندىلەرىمەن بىرگە عيماراتقا باسىپ كىردى.

بۇعان قوسا، ەۋرو وداق ەلدەرىندە ەكونوميكا دا تومەندەگەن. ساراپشىلار ەۋروپا ەكونوميكاسى بيىل 8،3%-عا قۇلدىراپ، كەلەسى جىلى ونىڭ 5،8%-ى قالپىنا كەلەدى دەپ بولجاپ وتىر (ءساۋىر ايىنداعى بولجام – 7،4% جانە +6،1% بولدى).

اقش-تىڭ باس ەپيدەميولوگى ەنتوني فاۋچي اقش "كوروناۆيرۋس ينفەكسياسىنىڭ العاشقى تولقىنىندا قاتتى زارداپ شەكتى" دەپ سانايدى. بۇل ەلدە قايتىس بولعاندار سانى 130 مىڭنان استى. ال جۇقتىرعاندار سانى  3 ميلليوننان استى.  

اۆسترالياداعى ەڭ ءىرى قالالاردىڭ ءبىرى مەلبۋرندا كوروناۆيرۋسقا بايلانىستى 6 اپتالىق كارانتين ەنگىزىلدى. بۇعان قوسا، ۆيكتوريا مەن جاڭا وڭتۇستىك ۋەلس اراسىنداعى شەكارا جاۋىپ تاستالدى.