ىشكى ىستەر ءمينيسترى ەرلان تۇرعىمبايەۆ الەۋمەتتىك جەلىدە جالعان اقپارات تاراتقاندار جاۋاپكەرشىلىككە تارتىلاتىنىن ايتتى.
– ىشكى ىستەر ورگاندارى ەلدە قۇقىق بۇزۋشىلىق ارەكەتتەردى انىقتاۋ بارىسىندا الەۋمەتتىك جەلىدە كۇن سايىن جالعان اقپاراتتىڭ تارالۋى جيىلەپ كەتكەنىن كورسەتتى. ءبىز مۇنداي حابارلامالاردى تەكسەرىپ وتىرامىز. قازىرگى ۋاقىتتا مۇنداي ەپيدەميولوگيالىق جاعدايلاردى جەكە تۇلعالار اۋديتوريانىڭ نازارىن اۋدارۋ ءۇشىن پايدالانادى. ولار اقپاراتتىڭ شىنايىلىعىنا كوز جەتكىزبەيدى. وسىلاردىڭ ىشىندە ەڭ كوپ تارالعان اۋديوحابارلامالار: "ۆيرۋس ەلدى مەكەنگە ۇشاقتار مەن تىكۇشاقتاردىڭ كومەگىمەن شاشىراتقان"، "قازاقستانعا بيوحيميالىق قارۋ شاشىراتقان" جانە ت.ب. "Facebook" جانە "Instagram" الەۋمەتتىك جەلىلەرىندە كەي پايدالانۋشىلار "بۇگىنگى اۋرۋدىڭ ءورشۋى بيولوگيالىق قارۋ-جاراقپەن حيميالىق شابۋىلدان ورىن الۋى مۇمكىن" دەپ حابارلاما تاراتتى، – دەدى مينيستر.
ول بۇل حابارلامالاردىڭ بارلىعى راستالماعان جانە شىندىققا جاناسپايدى دەپ اتاپ ايتتى.
– وسى جانە باسقا دا ۇقساس فاكتىلەر بويىنشا ءىىم تەرگەۋ دەپارتامەنتى قىلمىستىق كودەكستىڭ 274-بابى "بىلە تۇرا جالعان اقپارات تاراتۋ" بويىنشا سوتقا دەيىنگى تەرگەۋ جۇمىستارىن باستادى. مۇندا ايىپتالۋشىعا ايىپپۇل، تۇزەۋ جۇمىستارى، 7 جىلعا دەيىن باس بوستاندىعىنان شەكتەۋ نەمەسە ايىرۋ تۇرىندەگى جازا قولدانىلادى. مەن ازاماتتاردى رەسمي دەرەكتەرگە عانا سەنۋگە، ارانداتۋلارعا ۇشىراماۋعا جانە جالعان اقپاراتتى تاراتپاۋعا شاقىرامىن، – دەپ اتاپ ءوتتى ەرلان تۇرعىمبايەۆ.
پىكىر قالدىرۋ