ەل پرەزيدەنتى قاسىم-جومارت كەمەل ۇلى توقايەۆ حالىققا ۇندەۋىندە، قالىپتاسقان جاعدايدى اشىق ايتىپ، ەلىمىزدەگى ىندەتكە قارسى مەملەكەت تاراپىنان بارلىق شارالار قابىلدانىپ جاتقانىن جەتكىزدى.

قازىرگى اتقارىلىپ جاتقان جۇمىستار، قابىلدانىپ جاتقان شارالار حالىق ءۇشىن وتە ماڭىزدى. ويتكەنى ءدارىحانالاردا قاجەتتى دارى-دارمەكتەردىڭ بولماۋى، اۋرۋحانالاردا توسەك ورىنداردىڭ تاپشىلىعى، اۋىرعان ادامدارعا دەر كەزىندە ءتيىستى مەديسينالىق كومەكتىڭ كورسەتىلمەۋى قوعامدا ورىن الدى، حالىقتىڭ تالابىنا نەگىز بولدى. ەندى وسى قابىلدانعان شەشىمدەردى، شارالاردىڭ ۋاقىتىندا جۇزەگە اسىرىلۋىن، ورىندالۋىن باقىلاۋ قاجەت جانە اۋىرىپ جاقتان ءار ادامعا ناقتى مەديسينالىق كومەك كورسەتىلۋ كەرەك. بۇل ءۇشىن بار مۇمكىندىكتى پايدالانعان ءجون. اسىرەسە، ەرەن ەڭبەك ىستەپ جاتقان مەديسينا قىزمەتكەرلەرىنە اۋرۋلاردى ەمدەۋگە بايلانىستى بارلىق جاعداي جاساپ، ولارعا، وتباسىلارىنا بار قولداۋ، كومەك كورسەتىلۋ قاجەت.

اۋرۋحانالاردى دارى-دارمەكتەر، مەديسينالىق پرەپاراتتار، اپپاراتتارمەن قامتاماسىز ەتە وتىرىپ، قاي اۋرۋحانادا قانشا توسەك ورنى بار، مەديسينالىق كومەكتىڭ ساپاسى، كولەمى قانداي ەكەنى تۋرالى شىنايى اقپاراتتى حالىققا جەتكىزىپ وتىرعان ءجون. ويتكەنى حالىق تاراپىنان اۋرۋحاناعا بارعاندا توسەك ورىن جوق دەپ شىعارىپ سالۋ ماسەلەسى ءجيى كوتەرىلۋدە. بۇل باعىتتا اكىمدەردىڭ بەرىپ جاتقان مالىمەتتەرى وڭىرلەردەگى اۋرۋحانالار مەن ەمحانالاردىڭ جاعدايىنا نەگىزدەلۋ كەرەك. ايتپەسە، كەيبىر ءوڭىردىڭ اكىمدەرى اۋرۋحانالاردا قوسىمشا توسەك ورىندارى اشىلدى، جاعداي جاسالدى دەگەن مالىمەتتەرى بولسا دا ازاماتتار توسەك ورىندارىنىڭ تاپشىلىعىن، دارى-دارمەكتەردىڭ جەتىسپەۋشىلىگىن، اۋدان ورتالىقتارىندا پسر-لابوراتوريا جوق ەكەنىن، اناليز ۋاقىتىندا شىقپايتىنىن، جاعداي جاسالماعانىن كورىپ، ءتيىستى مەديسينالىق كومەككە قول جەتكىزە الماي وتىر. ءوز كەزەگىندە اكىمدەر پرەزيدەنتىمىزدىڭ – ءبىزدىڭ جۇمىسىمىز ايقىن، قوعام الدىندا ەشنارسەنى جاسىرماي، اشىق ايتامىز، – دەگەن باعىتىن ۇستانۋ قاجەت.

مەملەكەت باسشىسى دارىگەرلەرىمىز بۇقارالىق اقپارات قۇرالدارى ارقىلى ازاماتتارعا ناقتى، ءبىرىزدى مالىمەت بەرۋ كەرەكتىگىن، ونىڭ ماڭىزدىلىعىن دا اتاپ ءوتتى. بۇل قازىرگى تاڭدا حالىقتى قولداۋدىڭ ءبىر ءتۇرى. قازىرگى جاعدايدا، كوپتەگەن ازاماتتار ءۇي جاعدايىندا ەمدەلۋدە. ولار مامانداردىڭ، دارىگەرلەردىڭ كومەگىنە ءزارۋ. سوندىقتان، تەلەارنالار، الەۋمەتتىك جەلىلەر ارقىلى دا مەديسينا سالا قىزمەتكەرلەرى ەمدەلۋدىڭ جولدارىن، تۇرلەرىن، قانداي دارى-دارمەكتەر قاجەتتىلىگى، ولار قاي ءدارىحانالاردا بار ەكەنى تۋرالى ناقتى اقپارات بەرىپ وتىرسا، بۇل دا اۋىرىپ جاتقان ادامدارعا ۇلكەن قولداۋ، جاقسى كومەك بولار ەدى.

دارى-دارمەكتەر، اپپاراتتار ساتىپ الۋعا، مەديسينالىق قىزمەتكەرلەردى ىڭتالاندىرۋعا جانە باسقا دا كەزەك كۇتتىرمەيتىن ماسەلەلەردى شەشۋگە 150 ملرد تەنگە باعىتتالىپ وتىر. ۇندەۋدە بۇل تۋرالى اشىق جاريا ەتە وتىرىپ، پرەزيدەنت مەملەكەتتىك بيۋجەتتەن ءبولىنىپ جاتقان بارلىق قاراجاتتىڭ جۇمسالۋىن ەرەكشە باقىلاۋدا ۇستايتىنىن باسا ايتتى. ناقتى شەشىم شىعاردى. ويتكەنى، دەنساۋلىق ساقتاۋ سالاسىنا ءبولىنىپ جاتقان قاراجات ءتيىمدى، ماقساتىنا ساي جۇمسالىپ، مەديسينالىق كومەكتىڭ كولەمىن، ساپاسىن جاقسارتۋ كەرەك. حالىققا مەملەكەت قاراجاتى قايدا، قالاي جۇمسالعانى تۋرالى ەسەپ بەرىلىپ، ول تۋرالى اقپارات جاريالانىپ وتىرعانى دۇرىس. سوندا اشىقتىق قالىپتاسادى. حالىقتىڭ سەنىمى ارتادى. جالپى، "سق فارماسيا" ءجشس-نىڭ قىزمەتىنە، ونىڭ ساتىپ الىپ جاتقان دارى-دارمەكتەرىنىڭ باعاسىنا، ساپاسىنا، ونداعى مەملەكەت قاراجاتىنىڭ جۇمسالۋىنا قاتاڭ باقىلاۋ ورناتىلىپ، جاريالىق بولۋ كەرەك. ويتكەنى، بۇل سەرىكتەستىك بيۋدجەت قاراجاتىنا دارى-دارمەكپەن قامتاماسىز ەتەتىن جالعىز وپەراتور، مونوپوليست. بۇل باعىتتا ەلىمىزدە باسەكەلەستىك بولعانىن قولدايمىن.

ەل پرەزيدەنتىنىڭ قابىلداعان ناقتى شارالارى، شەشىمدەرى مىنانداي قيىن جاعدايدا حالىققا كورسەتىلەتىن مەديسينالىق كومەكتىڭ كولەمىن كوبەيتۋگە، ازاماتتاردىڭ دەنساۋلىعىن جاقسارتۋعا جول اشاتىنى ءسوزسىز.

ال، ءبىز ءوز تاراپىمىزدان قولىمىزدان كەلگەن قولداۋدى، كومەكتى حالىققا كورسەتەمىز. بار كومەكتەرىن كورسەتىپ جاتقان جاناشىر ازاماتتار مەن ەرىكتىلەرمەن بىرگەمىز، قولدايمىز. اق حالاتتى ابزال جاندارعا العىسىمىز شەكسىز. ەندى، ازاماتتار دا كارانتين ەرەجەلەرىن ساقتاۋعا، ونىڭ تالاپتارىن مۇقيات ورىنداۋعا، ىندەتتىڭ تارالۋىنا نەگىز بولاتىن ءىس-شارالاردى ۋاقىتشا توقتاتۋعا اتسالىسادى دەپ ويلايمىز.

بىرىگىپ، بىرلەسىپ وسى ىندەتتى جەڭەمىز!

نۇرتاي سابيليانوۆ،

پارلامەنت ءماجىلىسىنىڭ دەپۋتاتى